"გახარიას პოლიტიკური პასუხისმგებლობა ახლა სწორედ იმაში გამოიხატება, რომ ის რჩება თავის თანამდებობაზე"- მაია ცქიტიშვილი

პოლიტიკა - 13:08, 04 Jul, 2019

809

ვიცე-პრემიერი მაია ცქიტიშვილის განცხადებით, გიორგი გახარიამ შს მინისტრის პოსტი არ უნდა დატოვოს. მისი თქმით, გახარიას პასუხისმგებლობა ახლა იმით განისაზღვრება, რომ ის დარჩეს თანამდებობაზე და ძალოვანი უწყების გამართულად ფუნქციორება მოახერხოს.

"მინისტრის პოლიტიკური პასუხისმგებლობის საკითხი ამ ეტაპზე არანაირი სახით არ დგას. მისი პოლიტიკური პასუხისმგებლობა ახლა სწორედ იმაში გამოიხატება, რომ ის რჩება თავის თანამდებობაზე, ახორციელებს ყველა იმ ქმედებას, რომელიც არის საჭირო იმისთვის, რომ შსს-ს სისტემა მუშაობდეს სრულიად გამართულად. რაც შეეხება, ზოგადად პოლიტიკურ პასუხისმგებლობას, როგორც მინისტრის პასუხისმგებლობას, პირადად მისი პოზიციაც იყო, რომ მისი პასუხისმგებლობის საკითხიც ასევე განისაზღვრება გამოძიების შედეგების შესაბამისად,“ - განაცხადა მაია ცქიტიშვილმა.

ცქიტიშვილმა განსაკუთრებულ დავალებათა დეპარტამენტის უფროსის, გიორგი ყაყიჩაშვილისთვის უფლებამოსილების შეჩერების საკითხზეც ისაუბრა, მისი განმარტებით, ეს გადაწყვეტილება გამოძიების ობიექტურად წარმართვის საჭიროებიდან გამომდინარე მიიღეს.

„ვერ დავეთანხმები ოპონენტებს, რომლებიც ჯოხის გადატეხვად აფასებენ კონკრეტულად ამ საკადრო გადაწყვეტილებას. ამ შემთხვევაშიც მიღებულ იქნა გადაწყვეტილება, როგორც მე ვიხილე იგივე მედიაში, უფლებამოსილების დროებით შეჩერებასთან დაკავშირებით. შემდგომში იცით, რომ მიმდინარეობს გამოძიება ცალკეული პოლიციელების მხრიდან ძალის შესაძლო გადამეტებასთან დაკავშირებით, სწორედ ამ, პროცესში იქნა ეს გადაწყვეტილება მიღებული, რათა გამოძიების სრულ ობიექტურობას შევუწყოთ ხელი. გარდა ამისა, გამოძიება აჩვენებს შემდგომში თუ ვის ეკისრება პასუხისმგებლობა“-აცხადებს მაია ცქიტიშვილი.