აშშ-ის საელჩოში დამოუკიდებლობის 243-ე წლისთავისადმი მიძღვნილი მიღება გაიმართა

პოლიტიკა - 10:12, 04 Jul, 2019

1072

3 ივლისს ამერიკის შეერთებული შტატების საელჩოში აშშ-ს დამოუკიდებლობის 243-ე წლისთავისადმი მიძღვნილი მიღება გაიმართა. ღონისძიებაზე იმყოფებოდნენ, როგორც მმართველი გუნდის, ისე ოპოზიციისა და სამოქალაქო სექტორის წარმომადგენლები.

ცერემონიის დაწყებისას ამერიკის შეერთებული შტატებისა და საქართველოს ჰიმნი დაუკრეს. სტუმრებს შორის მდგარმა ჟურნალისტმა ლიკა ბასილაიამ და TV კავკასიის დირექტორმა, ნინო ჯანგირაშვილმა საქართველოს ჰიმნის შესრულებისას თვალზე ხელი აიფარეს და ამ ჟესტით მათ სოლიდარობა გამოუცხადეს 20 ივნისის ღამით განვითარებულ მოვლენებს.

სიტყვით გამოსვლისას აშშ-ს ელჩის მოვალეობის შემსრულებელმა ელიზაბედ რუდმა სტრატეგიულ პარტნიორობაზე გაამახვილა ყურადღება და სიტყვის ბოლოს ისიც აღნიშნა, რომ მას და მის კოლეგებს ეამაყებათ, რომ ზაფხულს საქართველოში ატარებენ. ელჩმა მოუწოდა სხვებსაც, რომ საქართველოში გაატარონ არდადეგები.

ამერიკის შეერთებულ შტატებში დამოუკიდებლობას 4 ივლისს აღნიშნავენ. ეს დღე ოფიციალურად უქმე დღეა.

1776 წლის 4 ივლისს ფილადელფიაში, პენსილვანიაში მიირეს ისტორიული დოკუმენტი, რომელშიც ჩრდილოეთ ამერიკის ბრიტანული კოლონიები დიდი ბრიტანეთისგან დამოუკიდებლობას აცხადებენ. დეკლარაცია გახდა პირველი ოფიციალური დოკუმენტი, რომელშიც კოლონიები ამერიკის შეერთებულ შტატებად მოიხსენიება.