კახელებმა შესაძლოა, გზა გადაკეტონ - დავით ჭიჭინაძე საგარეჯოს მოსახლეობას შეხვდა

პოლიტიკა - 09:36, 04 Jul, 2019

1130

საბანკო კრედიტები, მოტყუებული და გადაგდებული მოსახლეობა, ყურძნის და ატმის ფასი, ჩავარდნილი ტურიზმი, საყოფაცხოვრებო პრობლემები - ამ და სხვა თემებზე სასაუბროდ პატარა ჩაილურის ციხესთან საგარეჯო რაიონის მოსახლეობა შეიკრიბა. შეკრების ერთადერთი მიზანი მთავრობის ყურადღების მიპყრობა და წლების წინანდელი დაპირებების ასრულება იყო. წინააღმდეგ შემთხვევაში, მოსახლეობა ცენტრალური გზის გადაკეტვით იმუქრება.

გლეხებმა ამ პრობლემებზე სასაუბროდ მოძრაობა “სახალხო ტრიბუნის“ ლიდერი დავით ჭიჭინაძე მიიწვიეს. თუმცა, შეკრებილი მოსახლეობის რაოდენობამ, როგორც ჩანს, ზომაზე მეტად შეაშფოთა ადგილობრივი ხელისუფლება - შეხვედრა დაწყებულიც არ იყო, როცა ჩაილურის ციხესთან თავად კახეთის გუბერნატორი, ირაკლი ქადაგიშვილი მოვიდა, მაჟორიტარ დეპუტათან ერთად.

გუბერნატორმა გლეხებს სთხოვა, ოღონდ ახლა დაიშალეთ და შაბათს, დილიდან სოფლის მეურნეობის და ეკონომიკის მინისტრებს ჩამოგიყვანთო.

„მოძრაობის „სახალხო ტრიბუნა“ უპირველესი მიზანია, ხალხის ხმა სწორედ ხელისუფლებას გააგებინოს. დღეს კი, ეს კარგად და საკმაოდ ოპერატიულად გამოგვივიდა,“ - აცხადებს მოძრაობის ლიდერი დავით ჭიჭინაძე რომელიც მოსახლეობას დაპირდა, რომ პირადად გააკონტროლებს, რათა გუბერნატორის დაპირებები დროულად შესრულდეს.