"კალაძე „ქართული ოცნების“ იმ წარმომადგენლების მწკრივს მიუერთდა, რომლებიც ივანიშვილის დავალებას ასრულებენ"

"კალაძე „ქართული ოცნების“ იმ წარმომადგენლების მწკრივს მიუერთდა, რომლებიც ივანიშვილის დავალებას ასრულებენ" - ოპოზიცია თბილისის მერს პასუხობს

პოლიტიკა - 18:54, 03 Jul, 2019

857

თბილისის მერის განცხადებას იმის შესახებ, რომ 20 ივნისის ღამეს აქციის დაშლა არ მომხდარა და ეს იყო მოგერიება ოპოზიცია პასუხობს.
ოპოზიციის წევრები კახა კალაძეს სიცრუეში ადანაშაულებენ და აცხადებენ, რომ კალაძეც ახმოვანებს ხელისუფლებას, რომელიც არაადეკვატურია ქვეყანაში მიმდინარე მოვლენების მიმართ. ხელისუფლების ოპონენტების თქმით, კახა კალაძე ერთი მხრივ, იტყუება, მეორეს მხრივ კი პასუხისმგებლობას გაურბის.

„მთელმა საზოგადოებამ იხილა, რომ ეს იყო არა მხოლოდ დაშლა, არამედ სადამსჯელო ოპერაცია მთელი თბილისის ცენტრის მასშტაბით, სადაც ადამიანები დასახიჩრდნენ, დაკარგეს თვალი, მათ შორის ადამიანები, რომლებიც სიახლოვესაც არ იყვნენ პარლამენტის შესასვლელთან და ეს ხდებოდა მთელი ღამის განმავლობაში. პირველ რიგში, ეს არის ელემენტარული ტყუილი. მეორე - ეს არის პასუხისმგებლობისგან გაქცევა. კახი კალაძე „ქართული ოცნების“ იმ წარმომადგენლების მწკრივს მიუერთდა, რომლებიც ბიძინა ივანიშვილის დავალებას ასრულებენ, რომ შავზე თქვან თეთრი და არ აიღონ პასუხისმგებლობა ამ სასტიკ ღამეზე,“ - განაცხადა „ევროპული საქართველოს“ წევრმა, ელენე ხოშტარიამ.

ოპოზიციის წევრების თქმით, ადრე თუ გვიან ხელისუფლებას პასუხისმგებლობის აღება მაინც მოუწევს და შს მინისტრი, გიორგი გახარია გადადგება.

„უკან არ იხევს ამ თვალსაზრისით „ქართული ოცნება“, ჩაბღაუჭებულია გახარიას, როგორც შინაგან საქმეთა მინისტრს და ცდილობს, რომ ყოველდღიურად ახალ-ახალი უტიფარი გზავნილებით აჩვენოს ქართულ საზოგადოებას, საქართველოს მოქალაქეებს, რომ ისინი არ აპირებენ, უკან დაიხიონ და ისევ პასუხისმგებლობაზე ლაპარაკობენ ოპოზიციის მხრიდან. ეს დიდხანს არ გაგრძელდება. „ქართულ ოცნებას“ უკან დახევა მოუწევს, გახარიას მოუწევს გადადგომა იმიტომ, რომ ყველაფერთან ერთად სამართლებრივი დარღვევები, ეს უტიფარი, უპასუხისმგებლო პოლიტიკური განცხადებები, ისინი არიან ერთ მხარეს და მთელი საქართველოს საზოგადოება, პოლიტიკური პარტიები, სამოქალაქო საზოგადოება, ის ახალგაზრდები, რომლებიც უკან არ იხევენ, მეორე მხარეს დგას, ამიტომ, ეს ხელისუფლება იძულებული გახდება, რომ უკან დაიხიოს,“ - განაცხადა „რესპუბლიკური პარტიის“ თავმჯდომარემ, ხათუნა სამნიძემ.