"არ შეიძლება ესეთი საკითხები უყურადღებოდ რჩებოდეს" - მელიას ამბის გამო შესაძლოა "ოცნების"ურჩი დეპუტატები დასაჯონ

პოლიტიკა - 17:48, 03 Jul, 2019

971

„ქართული ოცნების“ რამდენიმე დეპუტატი იმ ურჩი დეპუტატების სამაგალითოდ დასჯას ითხოვს, რომლებმაც ნიკა მელიასთვის სადეპუტატო იმუნიტეტის მოხსნას მხარი არ დაუჭირეს. დარგობრივი ეკონომიკისა და განათლების კომიტეტების თავმჯდომარეებს, რომან კაკულიასა და მარიამ ჯაშს შესაძლოა საპარლამენტო თანამდებობები დაატოვებინონ. ვრცელდება ინფორმაცია, რომ დეპუტატებს ამის შესახებ საუბარი საერთო ჩატში ქონდათ, საიდანაც ინფორმაციამ გაჟონა. საპარლამენტო უმრავლესობის ლიდერი გიორგი ვოლსკი მსგავს მიმოწერას უარყოფს და ამბობს, რომ ეს საკითხი ჩათში გასარჩევი არ არის და გუნდმა უნდა იმსჯელოს ამ საკითხზე და გადაწყვეტილება ისე მიიღონ.

„მათი გადასაწყვეტი არ არის, პრინციპში, ეს გუნდმა უნდა იმსჯელოს ამ საკითხებთან მიმართებაში. არ შეიძლება ესეთი საკითხები უყურადღებოდ რჩებოდეს, მაგრამ ვერ დაგეთანხმებით იმაში, რომ ოთარ დანელიამ და ნუკრი ქანთარიამ განცხადებები გააკეთეს და ამ ჩათმა გაჟონა და მოვიდა იქამდე, რომ მერე ბოლოს თქვენთან დაბრუნდა და კითხვად იქცა ჩემს მიმართ. ასე, რომ აქ უფრო სერიოზულად არის საკითხი. მე მაქვს გარკვეული პრეტენზიები ამ ადამიანების მიმართ, მაგრამ რეალურად, როდესაც საკითხია, გაცილებით უფრო სერიოზული განხილვა და ყურადღება სჭირდება, ვიდრე რაღაცა ჩათიდან გამოტანილ ამბავზე კომენტარების კეთება“ - განაცხადა გია ვოლსკიმ.