"ინკლუზიურობა ძალიან მნიშვნელოვანია, ამიტომ ვითხოვთ ჯგუფის გაფართოებას"- ბოკუჩავა პარლამენტის თავმჯდომარისთვის გაგზავნილ წერილზე

პოლიტიკა - 14:50, 03 Jul, 2019

880

ოპოზიციურმა პოლიტიკურმა პარტიებმა დღეს ერთობლივი განცხადება გაავრცელეს და პარლამენტის თავმჯდომარეს, არჩილ თალაკვაძეს მიმართეს.

ოპოზიციური პარტიები მიიჩნევენ, რომ აუცილებელია, მოხდეს ეუთო/ოდირის რეკომენდაციების საფუძველზე შექმნილი, აღნიშნული სამუშაო ჯგუფის მონაწილეთა გაფართოება, რათა უზრუნველყოფილ იქნას ჯგუფის ინკლუზიურობა მომდევნო შეხვედრამდე (8-10 ივლისი).

განცხადებაში აღნიშნულია, რომ მას შემდეგ, რაც ქართულმა ოცნებამ პარლამენტში უკვე დაარეგისტრირა საკანონმდებლო ინიციატივა პროპორციული საპარლამენტო არჩევნების 2020 წელს უბარიერო/ბუნებრივი ბარიერის პირობებში ჩატარების შესახებ, პოლიტიკური ოპოზიციის ლიდერები მიიჩნევენ, რომ ამ ვითარებაში, არსებითად იზრდება იმ პარტიათა ჩამონათვალი, რომლებიც უნდა შევიდეს საარჩევნო კანონმდებლობის რეფორმირების საკითხზე შექმნილ სამუშაო ჯგუფში.

"ჩვენ ვთვლით, რომ ჯგუფის ინკლუზიურობა ძალიან მნიშვნელოვანია და ამიტომ მოვთხოვეთ აღნიშნული ჯგუფის გაფართოება და მათ შორის იმ პარტიების ჩართვა, რომლებიც აქტიურად მონაწილეობდნენ 300 000 -მდე ჩვენი მოქალაქის ხელმოწერის შეგროვებაში იმ პეტიციის დასაკმაყოფილებლად, რაც შევიტანეთ პარლამენტში სრულად პროპორციულ სისტემაზე გადასასვლელად მანამ სანამ ხელისუფლება გადადგამდა ამ ნაბიჯს იმ ფართომასშტაბიანი პროტესტის ფონზე, რაც 20 ივნისს, გავრილოვის ღამეს მოჰყვა"- განაცხადა "ნიუპოსტთან" თინა ბოკუჩავამ.

მისი თქმით, თალაკვაძის მიერ სამუშაო ჯგუფის გაფართოება რეალური დიალოგის წინაპირობა იქნება.

"თუ მათ აქვთ სურვილი, რომ რაიმე ტიპის რეალური დიალოგი შედგეს იმ პოლიტიკურ მოთამაშეებს შორის რომლებიც დიდი ხანია აქტიურად არიან ჩართულნი პროპორციულ სისტემაზე გადასვლის საკითხში და სამომავლოდ აქტიური მონაწილეები იქნებიან ქართულ პოლიტიკურ ლანდშაპტზე ვფიქრობ, რომ ძალიან რაციონალური იქნება მათი მხრიდან ამ შემოთავაზების მიღება. ბურთი ამ შემთხვევაში მათ მოედანზეა და მათი გადასაწყევტია როგორ სურთ ამ პროცესის წარმართვა"- დასძინა ენმ-ს დეპუტატმა.