კახეთში მცხოვრები 30 წლის ჟანეტ მინდორაშვილი სოციალურ მუშაკებს 1 თვის ჩვილის უკანონოდ ჩამორთმევაში ადანაშაულებს. ქალს შვილი რადენიმე დღის წინ წაართვეს მანამდე კი ისინი თბილისში თავშესაფარში ცხოვრობდნენ.

ადვოკატების ინფორმაციით, ქალმა დახმარებისთვის პოლიციას მიმართა თუმცა, დაკითხვის შემდეგ ის შენობიდან ჩუმად გაიყვანეს.

მათივე თქმით, ბავშვის უკანონოდ ჩამორთმევით დაინტერესებული დედის ნათესავია, რომელიც თავდაცვის სამინისტროში მუშაობს და სწორედ ამას უკავშირდება ბავშვის უკანონოდ მიტაცება.

"ვერ დავიცავით დედა, რომელსაც არ უნდოდა რომ გაშვილებულიყო მისი შვილი. ჩვენ დღეს პოლიციისგან ვართ მოტყუებული, სოციალური მუშაკებისგან ვართ მოტყუებული და ძალიან დიდი კითხვის ნიშნები ჩნდება იმ კეთილმოსურნე ნათესავის მიმართ, რატომ არის დღეს დაინტერესებული ეს ადამიანი, რომ შვილად აიყვანოს ჟანეტის შვილი, ეს არის ვალერიან კირვალიძე, რამდენადაც ვიცი თავდაცვის სამინისტროს მოქმედი თანამშრომელი" - აღნიშნა დედის უფლებადამცველმა ნანა ფილაურმა.