ჟენევაში დღეს მხარეებისა და თანათავმჯდომარეების ტექნიკური შეხვედრა გაიმართება, ხვალ დილიდან კი ფორმატის მონაწილეები 48-ე რაუნდისთვის მოლაპარაკებების მაგიდას მიუსხდებიან.

საქართველოს საგარეო საქმეთა მინისტრის მოადგილე ლაშა დარსალია ამბობს, რომ ჟენევაში რუსულ-ქართული ურთიერთობების ყველა მწვავე საკითხი განიხილება, საერთო ფონის გამო, რომელიც არის შექმნილი, კიდევ უფრო გართულებულია მოლაპარაკებები და ამ საკითხებზეც იქნება მსჯელობა.

მისი თქმით, ქართული დელეგაცია განსაკუთრებულ აქცენტს ბოლო მოვლენების ფონზე ე.წ. გადასასვლელების ჩაკეტვაზე გააკეთებს, რაც განსაკუთრებით ამძიმებს ჰუმანიტარულ ვითარებას ოკუპირებულ ტერიტორიებზე.

„მოგეხსენებათ, მოლაპარაკებების მთავარი თემა არის ექვსპუნქტიანი შეთანხმების შესრულების საკითხი, ასევე ის ჰუმანიტარული ვითარება, რომელიც გვაქვს ადგილზე. შესაბამისად, იქნება ძირითადი საკითხები, რასაც საქართველოს დელეგაცია დააყენებს, არის ის ჰუმანიტარული ვითარება და იმ საკითხების შესრულება, რომელიც გათვალისწინებულია ცეცხლის შეწყვეტის შესახებ შეთანხმებით. მთავრი თემა ამ ეტაპზე, როგორც მოგეხსენებათ, არის გადასასვლელების დაკეტვის საკითხი, რომელმაც კიდევ უფრო დაამძიმა ჰუმანიტარული ვითარება ადგილობრივი მოსახლეობისთვის. ჩვენ მოვითხოვთ ამ გადასასვლელების გახსნას“, - აღნიშნა ლაშა დარსალიამ.