თბილისის მერმა კახი კალაძემ ჟურნალისტის კითხვას "გავრილოვის სისხლიან ღამეს" ცრემლსადენი გაზისა და რეზინის ტყვიების გამოყენებამდე მომიტინგეების გაფრთხილებასთან დაკავშირებით უპასუხა.

კალაძის თქმით, "გავრილოვის სისხლიანი ღამის" აქცია სპონტანური იყო, სადაც ადამიანებმა თავიანთი გულწრფელი ემოცია გამოხატეს.

„თუ ხდება პოლიციის მხრიდან მოწოდება და მიღებულია გადაწყვეტილება, რომ დაიშალოს კონკრეტული აქცია, თუ მიტინგი, რა თქმა უნდა მიდის წარმომადგენელი და აფრთხილებს რომ ეს ასე ხდება და დაიშალეთ, მაგრამ ჩვენ რადიკალურად განსხვავებული მდგომარეობა გვქონდა, ეს იყო სპონტანური აქცია. ადამიანებმა გამოხატეს თავიანთი გულწრფელი პროტესტი, რასაც დილიდან დაწყებული ჩვენც ვუერთდებოდით, მეც, ჩემს თანაგუნდელებსაც, არავის მოეწონა ის, რომ პირველი, გავრილოვი პარლამენტში აღმოჩნდა და მეორე, დაიკავა სპიკერის სავარძელი. ეს კატეგორიულად მიუღებელი იყო და ჩემი ძალიან ახლო მეგობრებიც აპროტესტებდნენ ამას და იქ იყვნენ, მაგრამ ის, როგორც განვითარდა მოვლენები, ეს იყო თავდასხმა პირდაპირ და პოლიციას რა უნდა გაეკეთებინა? რომ გაჩერდით ბიჭებო ახლა უნდა გაგაფრთხილოთო? ეს არ ხდება ასე. ძალიან ცუდია ის რაც მოხდა, თუმცა, ამის მიუხედავად, თქვენ შეგიძლიათ ამოიღოთ განცხადება, ბრიფინგი რომელიც მე ჩავატარე პარტიაში, სადაც გაფრთხილება და მოწოდება იყო, რომ შეგვენარჩუნებინა სიმშვიდე, სიწყნარე, თორემ ამას მოჰყვებოდა შესაბამისი რეაგირება" - აღნიშნა კალაძემ.