მმართველი პარტიის მიერ პროპორციულ საარჩევნო სისტემაზე გადასვლასთან დაკავშირებული კანონპროექტის პრეზენტაციას „ერთიანი საქართველო - დემოკრატიული მოძრაობის“ ლიდერი ნინო ბურჯანაძე ეხმაურება. ბურჯანაძის თქმით, ამ პროცესის დ აწყება ძალიან მნიშვნელოვანია, ეს არის მონაპოვარი საზოგადოების და პოლიტიკური ძალების ძალისხმევისა და მას არაფერმა არ უნდა შეუშალოს ხელი:

„ძალიან მნიშვნელოვანია, რომ დღეს კონკრეტული ნაბიჯები გადაიდგა პროპორციულ სისტემაზე გადასვლასთან დაკავშირებით, ძალიან მნიშვნელოვანი იქნეოდა, რომ ხელისუფლებას ყოფნოდა გონიერება და ეს ნაბიჯი ადრე გადაედგა, ბევრ მძიმე დღეებს აცდებოდა ქვეყანა, მაგრამ ამ ეტაპზე უნდა ითქვას, რომ ხელისუფლებამ მიიღო ერთადერთი სწორი გადაწყვეტილება, კონფლიქტის მეტ-ნაკლებად რაღაც ჩარჩოებში მოსაქცევად და იმისათვის, რომ ქვეყანა მომავალში ნორმალურ გზას დაადგეს.

პროპორციული არჩევნები არის მართლაც საერთო მონაპოვარი, როგორც პოლიტიკური ძალების ასევე საზოგადოების, ეს მნიშვნელოვანია და არაფერმა არ უნდა შეუშალოს ხელი ამ სისტემაზე გადასვლას, იმიტომ რომ ეს არის ერთადერთი შანსი იმისათვის, რომ ქვეყანაში ჩატარდეს მართლაც ნორმალური არჩევნები და საქართველოს პარლამენტში იყოს წარმოდგენილი მოსახლეობის განწყობა და ის პარტიები, რომელთაც მოსახლეობა რეალურად მხარს უჭერს. ეს მოგვცემს შესაძლებლობას, რომ პოლარიცზაცია, რომელიც არის ქართულ საზოგადოებაში ქუჩიდან გადავიდეს პარლამენტში, ამავდროულად მე დღეს წამოვჭერი საკითხი და ძალიან მნიშვნელოვანია, რომ პროპორციული სისტემის მიღებასთან ერთად იყოს მსჯელობა იმასთან დაკავშირებით, რომ გამოირიცხოს მექანიზმები, რომელიც არჩევნების გაყალბებას ან მანიპულირებას შეუწყობს ხელს, იმიტომ რომ ჩვენმა პარტიამ თავისთავზე იწვნია 2016 წელს ოცნების და ენმ-ს ერთმანეთთან გარიგება, როდესაც ჩვენი მანდატები მშვენივრად გადაინაწილეს.“- განაცხადა ბურჯანაძემ.

კითხვაზე რამდენად შეძლებს ივანიშვილი მაჟორიტარების ამ ცვლილებაზე დათანხმებას, ბურჯანაძემ განაცხადა, რომ ივანიშვილს ეს არ გაუჭირდება:

„მე ძალიან კარგად ვიცი მაჟორიტარების სპეციფიკა და ივანიშვილს არ გაუჭირდება როგორც მინიმუმ უმრავლესობის დაყოლიება, ამის მექანიზმები ნამდვილად არსებობს, გარდა ამისა მე რამდენადაც ვიცი ერთმა ოპოზიციურმა პარტიამ განაცხადა, რომ ისინი მხარს დაუჭერენ პროპორციული სისტემის ცვლილებას. არაფერი ამას წინ არ უნდა აღუდგეს და ყველაფერი უნდა გავაკეთოთ იმისათვის, რომ ასეთი ფასით მოპოვებული ეს გამარჯვება დაკანონდეს და დამტკიცდეს.“- განაცხადა ნინო ბურჯანაძემ.