"რამდენიმე სამართალდამცველი დაკავებულს ავტოფარეხის სახურავიდან ქვემოთ მდგომ პოლიციელებს გადასცემს" - სოცმედიაში გავრცელებულ სკანდალურ ვიდეოს შსს ეხმაურება

პოლიტიკა - 15:06, 01 Jul, 2019

1514

სოციალურ ქსელში გავრცელებულ ვიდეოს, სადაც ჩანს რომ 21 ივნისის დილას, პოლიციის თანამშრომლებმა დაკავებისას მოქალაქე ავტოფარეხის სახურავიდან გადააგდეს შინაგან საქმეთა სამინისტრო ეხმაურება. უწყება მოქალაქის გადაგდებას უარყოფს და აცხადებს, რომ მოქალაქე დაკავებისას სამართალდამცავებმა ავტოფარეხის სახურავიდან ქვემოთ მდგომ პოლიციელებს გადასცეს

„ერთ-ერთი მედიასაშუალებით დღეს გავრცელებულ კადრებთან დაკავშირებით გვსურს განვმარტოთ, რომ კადრებში ასახულია აქციის ერთ-ერთი მონაწილის, მოქალაქე ნ.რ.-ს დაკავების ეპიზოდი.

კადრებში ნათლად ჩანს, რომ ავტოფარეხის სახურავზე მყოფი, მოქალაქე ნ.რ. არ ემორჩილება პოლიციის კანონიერ მოთხოვნას, რის შემდეგაც ხდება მისი ადმინისტრაციული წესით დაკავება, რა დროსაც რამდენიმე სამართალდამცველი მას ავტოფარეხის სახურავიდან ქვემოთ მდგომ პოლიციელებს გადასცემს.

აღსანიშნავია, რომ მოქალაქე ნ.რ., რომლის დაკავების კადრებსაც მედია საშუალება ავრცელებს, აქტიურ მონაწილეობას იღებდა მელიქიშვილის გამზირზე განხორციელებულ ვანდალიზმის აქტებში, მათ შორის მანქანის მტვრევის ეპიზოდშიც, რომელიც წინა დღეებში ფართოთ იქნა გაშუქებული სხვადასხვა მედიის მიერ.

დაკავებული აქციის მონაწილე ნ.რ.-მ, მოგვიანებით სასამართლო დარბაზში აღიარა ჩადენილი ადმინისტრაციული გადაცდომა და საჯარო ბოდიში მოიხადა. სასამართლომ მას 1000 ლარიანი ჯარიმა დააკისრა.“- ნათქვამია უწყების მიერ გავრცელებულ განცხადებაში.