"მხარდაჭერა ექნება ჩვენს მიერ ინიცირებულ კანონპროექტს" - ჩუგოშვილი ოპოზიციის ინიციატივას არ იცნობს

პოლიტიკა - 14:24, 01 Jul, 2019

925

პარლამენტის ვიცე-სპიკერის, „ქართული ოცნების“ წევრის თამარ ჩუგოშვილის თქმით, მმართველი გუნდისა და ოპოზიციის მიერ წარდგენილი საკონსტიტუციო ცვლილებები განხილვების ერთი და იგივე გზას გაივლის და მათზე სამუშაოდ ცალცალკე ჯგუფები შეიქმნება. ჩუგოშვილის თქმით, ის ოპოზიციის მიერ წარმოდგენილ კანონპროექტს არ იცნობს, თუმცა წინასწარ აცხადებს, რომ მისი მხარდაჭერა ქართული ოცნების კანონპროექტს ექნება:

„ის კანონპროექტი განხილული იქნება იგივე წესით, რაც ეს საკონსტიტუციო ცვლილებები, რაც გულისხმობს იმას რომ კონსტიტუციაში ინიცირებული ნებისმიერი ცვლილება რეგისტრირდება, გადის ერთთვიან საერთო სახალხო განხილვის პროცედურას, შემდგომ გამოდის კომიტეტზე და გადის 3 ეტაპს საკომიტეტო და პლენარული განხილვების. მეორე კანონპროექტიც, თუ ის ძალაში რჩება და ოპოზიცია მის უკან გახმობას არ აპირებს, გაივლის იგივე გზას თუმცა ჩვენი პოლიტიკური მხარდაჭერა ექნება ჩვენს მიერ ინიცირებულ ცვლილებებს და არა მეორეს.“- განაცხადა ჩუგოშვილმა.

იმ პოლიტიკური ძალის წარმომადგენელი, რომელიც 2012 წელს ხელისუფლებაში კოალიციით მოვიდა და მის შემადგენლობაში იმ დროისთვის 6 პარტია შედიოდა, მათგან რამდენიმე კი საკმაოდ დაბალ რეიტინგული, აცხადებს, რომ კოალიციების და ბლოკების შექმნა ოპოზიციას ბიუჯეტიდან ფულის მიღებისთვის უნდა:

„ბლოკების თემით ოპოზიცია ამბობს ასეთ რამეს, რომ ჩვენ ისიც თუ არ შეგვიძლია, რომ მოვაგროვოთ ხალხის მხარდაჭერის 0.7%, 11-12 ათასი ხმაც რომ ვერ მოვაგროვოთ მაინც უნდა შევიდეთ პარლამენტში. რამდენად ლოგიკურია ეს გადაწყვიტეთ, ბლოკების და კოალიციების შეკვრა ხდება არჩევნების შემდეგ პარლამენტში იმ ძალების მიერ, რომლებმაც გადალახეს ბარიერი და შევიდნენ პარლამენტში. მანამდე გაერთიანებას შეიძლება ქონდეს ერთადერთი ინტერესი და ეს არის ფულის მიღება ბიუჯეტიდან, ინტერესია, რომ პარტიებმა რომელთაც 0,7%-იც კი არ აქვს მხარდაჭერა, მიიღონ ფული და უფასო საეთერო დრო, და არა ის რომ ისინი ვერ ახერხებენ კონსოლიდაციას. კონსოლიდაცია ხდება მას შემდეგ რაც არჩევნები ჩატარდება და პარტიები პარლამენტში შევლენ.“- განაცხადა თამარ ჩუგოშვილმა.