"გახარიამ ნათლად თქვა, თუ დადგინდება უფლებამოსილების გადამეტების მასიურობა, აიღებს პასუხისმგებლობას"

"გახარიამ ნათლად თქვა, თუ დადგინდება უფლებამოსილების გადამეტების მასიურობა, აიღებს პასუხისმგებლობას" - ჩუგოშვილი

პოლიტიკა - 18:28, 29 Jun, 2019

917

პარლამენტის წინ მიმდინარე აქციებს და მომიტინგეების მთავარ მოთხოვნას, რომ გადადგეს შს მინისტრი, პარლამენტის ვიცე-სპიკერი თამარ ჩუგოშვილი ეხმაურება. მისი თქმით, ამ ეტაპზე მომხდარზე გამოძიება უმნიშვნელოვანესია. პარლამენტის ვიცესპიკერი, თამარ ჩუგოშვილი აცხადებს, რომ მმართველმა გუნდმა მომიტინგეების ორი მთავარი მოთხოვნა უკვე დააკმაყოფილა. ხოლო რაც შეეხება, გახარიას გადადგომას, ჩუგოშვილის თქმით, შსს-ს ან პოლიციელების მხრიდან უფლებამოსილების გადამეტების, არაპროპორციული ძალის გამოყენების მასიურობა დადგინდება, მინისტრმა განაცხადა, რომ ის ამაზე პასუხისმგებლობას აიღებს:

„ჩვენი გუნდის პოზიცია საკმაოდ გასაგებია ყველასთვის, აქციის მონაწილეებს ჰქონდათ რამდენიმე მოთხოვნა და ორი ძირითადი მოთხოვნა არის დაკმაყოფილებული, ორივე ჩვენთვის და იმედია, მათთვისაც ძალიან სერიოზული. რაც შეეხება გიორგი გახარიას, საკმაოდ ნათლად და მკაფიოდ დავაფიქსირეთ ჩვენი პოზიცია ამასთან დაკავშირებით. ამ ეტაპზე, რაც არის მნიშვნელოვანი და აუცილებელი, ესაა გამოძიებულ იქნას ვანდალური აქტები და ძალადობა, რომელსაც ადგილი ჰქონდა პარლამენტის წინ, შემდეგ კი, თბილისის სხვადასხვა წერტილში. ამ ყველაფერზე სამართლებრივი რეაგირება იქნება აუცილებლად და იქნება მკაცრი, ასევე, გამოძიება იქნება ძალის შესაძლო გადამეტების შემთხვევებზე.

ვფიქრობ, გახარიამ საკმაოდ ნათლად თქვა თავისი პოზიცია , მას შემდგომ, რაც გამოძიება ჩატარდება, თუ დადგინდება მასიურობა შსს-ს ან პოლიციელების მხრიდან უფლებამოსილების გადამეტების, არაპროპორციული ძალის გამოყენების, ამაზე ის აიღებს პასუხისმგებლობას, თუმცა მანამდე ეს უნდა დადასტურდეს.“- განაცხადა თამარ ჩუგოშვილმა.