მარიამ ჯაშმა საპარლამენტო უმრავლესობის შეხვედრის დასრულების შემდეგ ჟურნალისტებთან სხდომის დეტალებზე ისაუბრა.

ჯაში „ქართული ოცნების“ სწორედ ის დეპუტატია, რომელმაც ნიკა მელიასთვის სადეპუტატო იმუნიტეტის შეჩერებას მხარი არ დაუჭირა.

მისი თქმით, ძირითადი აქცენტი მიმდინარე მოვლენების განხილვას დაეთმო.

„რა მოლოდინიც მქონდა ჩემი კოლეგებისგან, ის გამართლდა. მიმდინარეობდა მსჯელობა გადაწყვეტილებების საფუძვლებზე. რაც შეეხება უმრავლესობის დატოვებას ან რამე სხვა საკადრო ცვლილებას, ეს საკითხი საერთოდ არ დამდგარა დღევანდელ დღის წესრიგში, უბრალოდ საინტერესო იყო იმ აზრთა გაცვლა, რომელმაც განსხვავებული აზრის მხარდაჭერა გამოიწვია. შესაბამისად, ჩვენ ძირითადი აქცენტი დავუთმეთ არა განსხვავებული აზრის განხილვას, არამედ მიმდინარე მოვლენებს. ჩემი მხრიდან აბსოლუტურად არ ყოფილა საჭირო დამატებითი არგუმენტების მიწოდება. იყო მსჯელობა ზოგადად პროცესზე. საკმაოდ ზედაპირულად და მოკლედ მოხდა ამ საკითხზე მსჯელობა“, – განაცხადა დეპუტატმა.