შეუჩერებენ თუ არა ნიკა მელიას დეპუტატის უფლებამოსილებას

შეუჩერებენ თუ არა ნიკა მელიას დეპუტატის უფლებამოსილებას - "ქართულ ოცნებაში" აზრი ორად იყოფა

პოლიტიკა - 09:50, 28 Jun, 2019

1124

27 ივნისს მოსამართლე თემურ გოგოხიამ არ დააკმაყოფილა პროკურატურის მოთხოვნა და ოპოზიციის ერთ-ერთ ლიდერს, პარლამენტის დეპუტატ ნიკა მელიას პატიმრობის ნაცვლად აღკვეთის ღონისძიებად 30 ათასიანი გირაო შეუფარდა და გარკვეული შეზღუდვები დაუწესა, კერძოდ, მელიას აეკრძალა: საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე, საზოგადოებრივი თავშეყრის ადგილას საჯარო განცხადებების გაკეთება, მოწმეებთან ნებისმიერი სახის კომუნიკაცია.

საპარლამენტო უმრავლესობის ნაწილი აცხადებს, რომ დაწესებული შეზღუდვების გამო მელია ვეღარ შეძლებს სრულფასოვან საქმიანობას, ამიტომ აუცილებელია მისთვის დეპუტატის მანდატის შეჩერებაზე იმსჯელონ.

„მართალია ის არ არის აღკვეთის ღონისძიებით პატიმრობაში, თუმცა ვიმეორებ, რომ ეს არის პატიმრობა არა ოფიციალური ტერმინით, არამედ სპეციალური ქცევის წესებით, ეს პრაქტიკულად უზღუდავს მას შესაძლებლობას, რომ საპარლამენტო საქმიანობა აწარმოოს. აქედან გამომდინარე რა თქმა უნდა ჩვენ ვიმსჯელებთ მისი, როგორც პარლამენტის წევრის უფლებამოსილების შეჩერებასთან დაკავშირებით,“-განაცხადა პარლამენტის საპროცედურო საკითხთა და წესების კომიტეტის თავმჯდომარის პირველმა მოადგილემ გურამ მაჭარაშვილმა.

მაჭარაშვილისგან განსხვავებულია მდინარაძის მოსაზრება. პარლამენტის ფრაქცია „ქართული ოცნების“ თავმჯდომარე, ნიკა მელიასთვის დეპუტატის მანდატის შეჩერების საფუძველს ვერ ხედავს. მდინარაძე ამბობს, რომ საჭიროა მოხდეს სასამართლო განჩინების დასაბუთებულ დადგენილების გაცნობა.

„არასაპატიმრო აღკვეთის ღონისძიება არ არის უფლებამოსილების შეჩერების საფუძველი. მე პირადად მგონია, რაც მაქვს იმ მწირი ინფორმაციის საფუძველზე, განჩინების წაკითხვამდე, რომ მას სადეპუტატო უფლებამოსილების შეჩერებასთან დაკავშირებით პრობლემა არ ექნება. ანუ არ შეუჩერდება სადეპუტატო უფლებამოსილება,“- განაცხადა მამუკა მდინარაძემ.

ოპოზიცია მმართველი გუნდის მხრიდან მორიგ შურისძიებას არ გამორიცხავს:

„ყველანაირი დისკომფორტი რასაც შეძლებენ, რა თქმა უნდა შესაძლებელია. მით უმეტეს, მათ პოლიტიკურად აღარ გამოუვიდათ მისი დაკავება, რაც ძალიან უნდოდათ. ძალიან ღირსება დაკარგულად გააკეთეს ეს პროცესი, წარმოუდგენლად დაკარგეს მორალური სახე. ამიტომ ახლა მელია, ამიტომ ყველაფერს ეცდებიან, მაგრამ აბსოლუტურად ვერაფერს ვერ მიაღწევენ მთავარ საკითხში, დღეს მათ აუჯანყდათ ქართული საზოგადოება.“- განაცხადა ელენე ხოშტარიამ.