შინაგან საქმეთა მინისტრი მედიის წარმომადგენლებთან შეხვედრას მართავს

პოლიტიკა - 20:01, 27 Jun, 2019

751

შინაგან საქმეთა სამინისტროში გიორგი გახარია შეხვედრას მართავს მედიის წარმომადგენლებთან. შეხვედრაში მონაწილეობას იღებენ ქართული ტელეარხების, პოლიტიკური თოქშოუების წამყვანები. შეხვედრა 20 ივნისს და მას შემდეგ განვითარებულ მოვლენებს შეეხება.

„ჩვენ ყველანი დღეს აქ შევიკრიბეთ საკმაოდ რთული საუბრისთვის, მაგრამ იმ საუბრისთვის, რომელიც აუცილებელია. ჩვენ, იმედი მაქვს, რომ გვექნება საშუალება შინაარსობრივად ვისაუბროთ იმაზე, რაც მოხდა 20 ივნისს. იმედი მაქვს და დარწმუნებული ვარ, რომ ეს მძიმე დღე და მძიმე დღეები, რომელიც გადავიტანეთ ყველამ ერთად, გვექნება საშუალება, რომ განვიხილოთ, გავაანალიზოთ და გავუზიაროთ ერთმანეთს როგორც ჩვენი მოსაზრებები, ასევე, შეფასებები.
ეს იყო მძიმე დღეები, ძალზედ რთული ღამე და სამწუხაროდ გვყავს დაშავებულები როგორც აქციის მონაწილეები ასევე, პოლიციელები და ჟურნალისტებიც და შეუძლებელია, რომ ჩვენ ყველამ ერთად, საზოგადოებასთან ერთად არ მივცეთ ამ ღამეს შეფასება. იმის მიუხედავად, რომ ვერ მოხერხდა პარლამენტის ტრიბუნიდან საუბარი, რასაც ვგეგმავდით ხვალისთვის, იმედი მაქვს, რომ თქვენ, როგორც ჩვენი სამოქალაქო სექტორის, ჩვენი მოქალაქეების მოსაზრებები, კითხვების, მათი განწყობების ობიექტური გადმომცემები იქნებით. თუმცა, ასევე მესმის, რომ იქნება საშუალება სუბიექტური შეფასებებსაც და მე მექნება საშუალება ასევე, მოგაწოდოთ და გაგიზიაროთ ის აზრი რისი თქმაც და მიტანაც, მე როგორც ამ უწყების ხელმძღვანელს მსურს და ვთვლი, რომ აუცილებელია თითოეული ჩვენი მოქალაქისთვის.
ეს არის მიზანი და ვთვლი, რომ არ გვაქვს ახლა ჩვენ აქ ბევრი საუბრის აუცილებლობა, ყველას კარგად გვესმის კონტექსტი და ამიტომ ვთვლი, რომ აბსოლუტურად ყველანაირი პრობლემის გარეშე შეგვიძლია გადავიდეთ საქმეზე და მზად ვართ ღია, მწვავე, ობიექტური და თუნდა სუბიექტური საუბრისთვის და შეფასებისთვის.
ვფიქრობ და მჯერა, რომ თქვენ ხართ მედია სექტორის ის წარმომადგენლები, რომლებიც ძალზედ ობიექტურად გრძნობთ იმას, რა კითხვებზე პასუხს ელის დღეს ჩვენი საზოგადოება.“ - განაცხადა გიორგი გახარიამ