"მელია გუშინ არავის დაუპატიმრებია და ეს იყო ბინძური ტყუილი და სასამართლო ნამდვილად დამოუკიდებელია"- მდინარაძე

პოლიტიკა - 17:59, 27 Jun, 2019

815

მამუკა მდინარაძე ნიკა მელიასთვის აღკვეთის ღონისძიების სახით 30 000-ლარიანი გირაოს შეფარდებას ეხმაურება და ამტკიცებს, რომ სასამართლო თავისუფალია.

"რეალურად ორი რამ აღმოჩნდა სიმართლე. ერთი სიმართლე ის, რომ თურმე ნიკა მელია გუშინ არავის დაუპატიმრებია და ეს იყო სპეკულაციური, ბინძური ტყუილი, რაც „ნაციონალურ მოძრაობას“ ახასიათებს და სასამართლო ნამდვილად დამოუკიდებელია.

სიმართლე არის სასამართლოს დამოუკიდებლობა და სიმართლე არის კიდევ ერთი, რომ გუშინ „ნაციონალურმა მოძრაობამ“ მოატყუა ქართული საზოგადოება და ძალიან სპეკულაციური, ბინძური მესიჯი გაუშვა, სადაც ამბობდა, რომ საქართველოს პარლამენტმა დააპატიმრა ნიკა მელია. ხომ აღმოჩნდა დღეს რომ ეს ტყუილი იყო?! ანუ რასაც ვიმეორებდით, ის არის მართალი. საქართველოს პარლამენტმა გასცა თანხმობა იმასთან დაკავშირებით, რომ აღკვეთის ღონისძიების სახით პატიმრობასთან დაკავშირებით მიემართა პროკურატურას სასამართლოსათვის. სასამართლომ გადაწყვიტა ასე - გირაო მკაცრი პირობებით, ე.წ. ამ შემთხვევაში შინაპატიმრობა, ეს აღკვეთის ღონისძიება არ არის სისხლის სამართლის საპროცესო კოდექსში, მაგრამ გირაო მკაცრი პირობებით პრაქტიკულად ამას ნიშნავს. ნაციონალურმა მოძრაობამ“ მოხსნა გუშინდელი მესიჯი, თითქოს გუშინდელი ნათქვამი დაავიწყდება ყველას, რომ თურმე დაგვიპატიმრებია, ხომ აღმოჩნდა ტყუილი? - განაცხადა მამუკა მდინარაძემ.