"დაინახა ოლიგარქმა, რომ მის ხელისუფლებას ემუქრება საფრთხე, ის ყანყალებს და დემონტაჟი დაწყებულია"- ბაჩუკი ქარდავა სასამართლოს გადაწყვეტილებაზე

პოლიტიკა - 17:04, 27 Jun, 2019

640

გაერთიანებული ოპოზიციის ერთ-ერთმა ლიდერის ბაჩუკი ქარდავას თქმით, ოლიგარქ ივანიშვილს ხალხის პროტესტის შეეშინდა და სასამართლოს ნიკა მელიასთვის პატიმრობა არ შეაფარდებინა. ქარდავას თქმით, ნიკა მელიასთვის, როგორც ბრალის წარდგენა, ასევე გირაოს სანაცვლოდ გათავისუფლებაც პოლიტიკური გადაწყვეტილება იყო.

“ქართული საზოგადოება და მისი პროტესტი არის გადამწყვეტი ძალის მქონე ამ ქვეყანაში. ოლიგარქის ბევრი ფული, ბევრი პოლიცია და სპეცრაზმი, ვერავინ გაუწევს ქართველ ხალხს წინააღმდეგობას. დაინახა ოლიგარქმა, რომ მის ხელისუფლებას ემუქრება საფრთხე, ის ყანყალებს და დემონტაჟი დაწყებულია. მან მიიღო გადაწყვეტილება ოპოზიციის აქტიური ლიდერის დაპატიმრებაზე, მაგრამ ბოლომდე ვერ დადგა იმიტომ რომ ეშინია პროტესტის. დარწმუნებული ვარ რომ ამაში დიდი როლი აქვს ჩვენ დასავლელი მეგობრების პოზიციასაც.“- განაცხადა ქარდავამ.

ედპ-ს ლიდერის თქმით, ივანიშვილმა თავის საპარლამენტო უმრავლესობა „გააბანძა“:

„ერთი რამე ვერ გავიგე, რატომ გააბანძა ივანიშვილმა თავისი უმრავლესობა პარლამენტში. გუშინ დეპუტატების გადაწყვეტილება იყო მორალთან და სინდისთან ძალიან შორს მდგომი. ეს რატო გაუკეთა იმ ადამიანებს, თუ საბოლოო ჯამში აქამდე მოვდიოდით. ნურავინ იტყვის რომ დამოუკიდებელმა სასამართლომ მიიღო გადაწყვეტილება. მელიას დაპატიმრება იქნებოდა ივანიშვილის პოლიტიკური გადაწყვეტილება, ასევე მისი გათავისუფლებაც არის პოლიტიკური გადაწყვეტილება, ისე ეს სასასმართლო გადაწყვეტილებას ვერ მიიღებდა. ერთ ფაქტორსაც აქვს მნიშვნელობა ამ დღეებში მათ სურთ მოსამართლეების დანიშვნა და შეიძლება რაღაც სპექტაკლთან გვაქვს საქმე.“- აღნიშნა ქარდავამ.

ბაჩუკი ქარდავას განცხადებით, ქვეყანაში არსებული საზოგადოებრივი პროტესტის შეჩერება შეუძლებელია და სწორედ ეს პროტესტი ჩამოშლის ოლიგარქის ხელისუფლებას:

„მთავარი მაინც ერთია და მინდა ამას ხაზი გავუსვა, საზოგადოებრივი პროტესტი, ქართველინ ახალგაზრდების ქუჩაში დგომა ეს არის გადამწყვეტი ფაქტორი და მხოლოდ ეს შეაჩერებს და ჩამოშლის ოლიგარქის ხელისუფლებას. ეს პროტესტი არის ქართულ საზოგადოებაში და უბრალოდ ახლა ის სამზარეულოებიდან გამოვიდა გარეთ. ამ პროტესტის შეჩერება შეუძლებელია.”- განაცხადა ბაჩუკი ქარდავამ.