„საზოგადოებამ კარგად უნდა გაიგოს, რომ ჩვენ მიერ გადადგმული ნაბიჯი არავის დაჭერას და დაპატიმრებას არ გულისხმობს“- დავით მათიკაშვილი

პოლიტიკა - 21:03, 26 Jun, 2019

889

უმრავლესობის დეპუტატი, დავით მათიკაშვილი „ნაციონალური მოძრაობისა“ და გაერთიანებული ოპოზიციის ერთ-ერთი ლიდერის წინააღმდეგ მისი გუნდის გადაწყვეტილებას აფასებს. როგორც დეპუტატი განმარტავს, საზოგადოებამ კარგად უნდა გაიგოს, რომ უმრავლესობის მიერ გადადგმული ნაბიჯი არავის დაჭერას და დაპატიმრებას არ გულისხმობს. მათიკაშვილის თქმით, ეს არის საშუალება სამართალდამცავი ორგანოებისთვის, არ მოხდეს ვინმეს დამალვა იმუნიტეტის ქვეშ.

„ჩვენთვის მნიშვნელოვანი იყო პროკურატურის პოზიცია, ანალიზი და მოვისმინეთ მთავარი ბრალმდებელი ორგანოსგან, რომ მათ გააჩნიათ ყველა მინიმალური სტანდარტი მტკიცებულებების, რომელიც განაპირობებს ამ სახის საპროცესო მოქმედების ჩატარების აუცილებლობას. საზოგადოებამ ეს უნდა კარგად გაიგოს და გაითავისოს, ჩვენ მიერ გადადგმული ნაბიჯი არანაირად არც არავის დაჭერას და დაპატიმრებას არ გულისხმობს, ეს არის საშუალება სამართალდამცავი ორგანოებისთვის, არ მოხდეს არავის იმუნიტეტის ქვეშ დამალვა, არ მოხდეს ინდულგირება სტატუსიდან გამომდინარე რომელიმე თანამდებობის პირის, თუ მის ქმედებაში არსებობს დანაშაულის ნიშნები და მან ჩაიდინა დანაშაული, რა თქმა უნდა, აბსოლუტურად ყველამ, მათ შორის ასეთი სტატუსის მქონე პირებმაც შესაბამისად უნდა აგონ პასუხი ქართველი ხალხის წინაშე“, – განაცხადა დავით მათიკაშვილმა.

დღეს, გაერთიანებული ოპოზიციისა და "ერთიანი ნაციონალური მოძრაობის" ლიდერს, ნიკა მელიას პარლამენტარებმა სადეპუტატო მანდატი მოუხსნეს. რეგისტრაცია 92-მა დეპუტატმა გაიარა, 91-მა კი ნიკა მელიას იმუნიტეტის მოხსნას მხარი დაუჭირა.