"თქვენ ხართ ყველაზე სუსტები და უსუსურები და უბრალოდ მართლა მეცოდებით"- სერგო რატიანმა ბიუროს სხდომა პროტესტის ნიშნად დატოვა

პოლიტიკა - 16:41, 26 Jun, 2019

800

„ევროპული საქართველოს“ წევრმა სერგო რატიანმა დღეს ბიუროს სხდომაზე სადაც ნიკა მელიასთვის დეპუტატის იმუნიტეტის მოხსნაზე მსჯელობენ, იმისთვის, რომ პროკურატურას მისი დაპატიმრების საშუალება მიეცეს, „ხორავას ქუჩის“ საქმე გაიხსენა და ამ საქმესთან მიმართებაში უმრავლესობის წევრების განცხადებებზე გააკეთა აქცენტი. სერგო რატიანის თქმით, მაშინ როდესაც იყო უამრავი მტკიცებულება დანაშაულისა და პროკურატურის მხრიდან დარღვევებისა, „ქართული ოცნების“ დეპუტატებმა მტკიცებულებები არ გაითვალისწინეს, დღეს კი ნიკა მელიასთვის დეპუტატის იმუნიტეტის მოხსნა მტკიცებულებების გარეშე გადაწყვიტეს. რატიანის განცხადებით, უმრავლესობის წევრებს თავისი ძალის დემონსტრირება სურთ და სწორედ ამაშია მათი უსუსურობა და სისუსტე:

„დღეს როდესაც შემოვიდა შუამდგომლობა, მოვიდა პროკურატურა და თქვა რომ მას არანაირი მტკიცებულება არ წარუდგენია, კომიტეტმა ხბოს აღტკინებით თქვა, რომ ჩვენთვის ეს საკმარისია, პროკურატურა რომელსაც არ აქვს ავტორიტეტი და რეპუტაცია დაკარგული აქვს ჩვენ გვჯერა მათი, რომ აქვთ რაიმე მტკიცებულება და მისცეს მწვანე შუქი ნიკანორ მელიას დაპატიმრებას, თქვენ გინდათ ძალის დემონსტრირება იმ ფონზე როდესაც არის ფართომასშტაბიანი საპროტესტო აქციები, როდესაც ხალხი აპროტსტებს იმას რაც მოხდა, ღამით კი მოხდა ის რომ თქვენ ესროლეთ ადამიანებს, რომლებიც იცავდნენ საქართველოს ღირსებას, რაც თქვენ ვერ შეძელით, თქვენ გინდათ ძალის დემონსტრირება, კონფრონტაცია, მაგრამ ამ ძალის დემონსტრაციის დროს დღეს საქართველოს პარლამენტი თავისი არსებობის განმავლობაში არ ყოფილა იმდენად სუსტი, იმდენად უსუსური და უმრავლესობა და ხელისუფლება არ ყოფილა იმდენად უსუსური, როგორიც არის დღეს, თქვენ გგონიათ, რომ მიაჭერთ ღილაკს, ვიღაცას დაიჭერთ და ეს იქნება იმის სიგნალი, რომ თქვენ ხართ ძლიერები, დღეს თქვენ ხართ ყველაზე სუსტები და უსუსურები და უბრალოდ მართლა მეცოდებით, თითოეული თქვენგანი ვინც ამას გააკეთებთ.“- განაცხადა სერგო რატიანმა და პროტესტის ნიშნად ბიუროს სხდომა დატოვა.

მმართველი გუნდის წევრმა ანრი ოხანაშვილმა მას მატყუარა უწოდა და მოუწოდა, რომ დარჩენილიყო ბიუროს სხდომაზე და შესაბამისი პასუხები მოესმინა.