საკუთარი მაღაზიის ვიტრინაზე „ნაციონალური მოძრაობის“ პლაკატის გაკვრის გამო თემქის დასახლებაში მცხოვრები პარტიის აქტივისტი სცემეს. კახა კალაშოვი აცხადებს, რომ მას „ქართული ოცნების“ წარმომადგენლები გაუსწორდნენ.

ინციდენტი იმ დღეს მოხდა, როცა სპორტის სასახლეში „ნაციონალური მოძრაობის“ ყრილობა ტარდებოდა: „მოვიდნენ და დამიწყეს მუქარა შვილების მისამართით, მერე კი თავში ჩამარტყეს. თუ ჩემს შვილებსა და ოჯახის წევრებს რაიმე საფრთხე დაემუქრებათ, პასუხს მოვთხოვ არამარტო „ქართულ ოცნებას“, არამედ პოლიციასაც“, - აცხადებს აქტივისტი.

დაზარალებული კალაშოვი გუშინ საღამოს სახლში მოინახულეს გიორგი ვაშაძემ და დავით საყვარელიძემ: „ამაზრზენი ფაქტი მოხდა. თუ ვინმეს კიდევ გაუჩნდება სურვილი, რომ ფიზიკურად გაუსწორდნენ ჩვენი პარტიის წევრებსა და აქტივისტებს, მინდა ვუთხრა მათ: ეს არ შეგრჩებათ და ძალიან გთხოვთ, თავი შეიკავოთ“, - განაცხადა გიორგი ვაშაძემ.