"რეაგირება იქნება იმათ მიმართაც, ვინც იყო წამქეზებელი და ორგანიზატორი ძალადობრივი მოქმედებების"- პარლამენტის თავმჯდომარე

პოლიტიკა - 17:05, 25 Jun, 2019

637

პარლამენტის თავმჯდომარე, არჩილ თალაკვაძე 20 ივნისის ღამის დარბევაზე პირველ კომენტარს აკეთებს. მისი თქმით, შს მინისტრი და შს სამინისტრო კონსტიტუციის ფარგლებში მოქმედებდა.

პარლამენტის თავმჯდომარის განცხადებით, პასუხისმგებლობა დაეკისრება, როგორც იმ პირებს, ვინც ძალას გადააჭარბა დარბევისას და მათაც, ვინც ორგანიზება გაუწია პოლიციელების მიმართ ძალადობას.

„რეაგირება იქნება იმათ მიმართაც, ვინც იყო წამქეზებელი და ორგანიზატორი ამ ძალადობრივი მოქმედებების. რაც შეეხება შს სამინისტროს, შს მინისტრი და სამინისტრო მოქმედებდნენ კონსტიტუციისა და კანონმდებლობის შესაბამისად, მაშინ, როცა რეაგირება მოახდინეს მანიფესტანტებთან მყოფი ერთი ძალადობრივი ჯგუფის და მათ მიერ ორგანიზებული მოქმედებების საპასუხოდ.

პრაქტიკულად, ორი საათის განმავლობაში პოლიციელების მიმართ იყო შტურმი და ძალადობა, შემდგომში ის საპოლიციო მოქმედებები, რაც ვნახეთ, ეს იყო რეაგირება და პასუხი ამ ძალადობრივ შტურმზე. რეაგირება იქნება იმათ მიმართაც, ვინც იყო წამქეზებელი და ორგანიზატორი ამ ძალადობრივი მოქმედებების,“ - განაცხადა თალაკვაძემ.