"გახარია პარლამენტში მისვლით ხალხს კიდევ უფრო გააღიზიანებს" - ოპოზიცია შს მინისტრის მიერ დაგეგმილ პროვოკაციაზე საუბრობს

პოლიტიკა - 09:53, 25 Jun, 2019

1615

შინაგან საქმეთა მინისტრი, გიორგი გახარია კვირის ბოლოს პარლამენტში მისვლას გეგმავს. მან საკანონმდებლო ტრიბუნა თვითონ მოითხოვა.

ოპოზიციაში აცხადებენ, რომ ივანიშვილი შს მინისტრისა თანამდებობიდან გახარიას გათავისუფლებას არ აპირებს.

„თურმე არ აპირებს გადადგომას და ივანიშვილი არ აპირებს მის გადაყენებას და მეორე ფაქტობრივად აპირებენ პროვოკაციის მოწყობას. შეიძლება ამას მოჰყვეს დიდი მღელვარება, როგორც პარლამენტის შიგნით ისე გარეთ. მე არც ერთი კითხვა არ მაქვს გახარიასთან, მან ჩემს თვალში დაკარგა ლეგიტიმაცია,“- განაცხადა „ნაციონალური მოძრაობის“ ერთ-ერთი ლიდერმა რომან გოცირიძემ.

„ევროპული საქართველოს“ ერთ-ერთი ლიდერის სერგი კაპანაძის განცხადებით, შს მინისტრი შელახულ რეპუტაციას ვეღარ აღიდგენს.

„მას ჰგონია, რომ პარლამენტში მოსვლით რაიმეს შეცვლის და გაითეთრებს რეპუტაციას გახარია უნდა წავიდეს, რადგან როგორც ყორანი არ გათეთრდება ისე არ გათეთრდება გახარია. თუ მას უნდა კიდევ უფრო გააღიზიანოს ის ხალხი მოვიდეს, ამ შემთხვევაში მთელი პასუხისმგებლობა მასზე იქნება,“-აცხადებს კაპანაძე.

საპატლამეტო უმრავლესობის წევრის, ანრი ოხანაშვილის თქმით, ოპოზიციას გარკვეული არეულობის მოწყობის მცდელობა აქვს.

"მაშინ, როდესაც შს მინისტრი აცნობიერებს მის პასუხისმგებლობას, მოდის პარლამენტში უნდა, მიმართოს საზოგადოებას და პარლამენტის წევრებს, უნდა განახორციელოს კონკრეტული საკითხების ახსნა. ამ ყველაფრის ფონზე „ნაციონალური მოძრაობის“ წევრების მხრიდან საუბარი იმაზე, რომ რაღაც რისკებს ხედავენ, შეიძლება არ შემოუშვან ეს ნიშნავს იმას, რომ სავარაუდოდ გეგმავს კიდევ გარკვეული დესტაბილიზაციის შექმნის მცდელობას,“-აცხადებს ანრი ოხანაშვილი.