დღეს საპროტესტო აქცია შსს-სა და პარლამენტთან გაიმართება

პოლიტიკა - 10:14, 24 Jun, 2019

1336

დღეს 14 საათზე თბილისის ცენტრში მიმდინარე აქციის მონაწილეები ავტოკოლონებით შს სამინისტროსკენ გაემართებიან და პროტესტს სიგნალებით გამოხატავენ. აქციის მონაწილეები 20 ივნისის ღამით აქციის დარბევაზე პასუხისმგებლობას შს მინისტრს აკისრებენ და გიორგი გახარიას გადადგომას ითხოვენ.

19:00 საათზე საპროტესტო აქცია ისევ პარლამენტის წინ განახლდება. აქციის მონაწილეებს 3 მთავარი მოთხოვნა აქვთ, გიორგი გახარიას გადადგომა, საპარლამენტო არჩევნების პროპორციული სისტემით ჩატარება და აქციის დროს დაკავებული პირების გათავისუფლება.

რამდენიმე დღის წინ საქართველოში მართლმადიდებლობის პარლამენტთა შორისი ასამბლეის სხდომა ჩატარდა და საქართველოს პარლამენტში ირაკლი კობახიძის სავარძელი ოკუპანტი ქვეყნის წარმომადგენელმა სერგეი გავრილოვმა დაიკავა და შეკრებილ საზოგადოებას რუსულად მიმართა. აღნიშნულ ფაქტს როგორც პარლამენტში ოპოზიციის მხრიდან ასევე პარლამენტს გარეთ საზოგადოებაში დიდი პროტესტი მოჰყვა. მრავალრიცხოვანი საპროტესტო აქცია 20 ივნისის ღამით სასტიკი მეთოდით დაშალეს. მეორე დღეს ირაკლი კობახიძე თანამდებობიდან გადადგა. საპროტესტო აქციები უკვე მეოთხე დღეა გრძელდება.