სახიფათო 12 კალიბრიანი ტყვია, რომელიც აქციის მონაწილეებს ესროლეს - არასწორმა გამოყენებამ შესაძლოა სიკვდილიც გამოიწვიოს (ვიდეო)

პოლიტიკა - 02:51, 22 Jun, 2019

2314

ტყვია, რომელიც სპეცდანიშნულების რაზმმა აქციის მონაწილეების წინააღმდეგ გამოიყენა 12 კალიბრიანია და მისი არასწორად გამოყენების შემთხვევაში, შესაძლოა, შედეგი ლეტალური აღმოჩნდეს. აღნიშნულ ტყვიას სამხედრო სწავლებებშიც იყენებენ და მწარმოებელი მიუთითებს, რომ მისი გამოყენებისას, სავალდებულოა შესაბამისი ინსტრუქციების დაცვა.

კერძოდ, სროლისას პოლიციელმა უნდა გაითვალისწინოს ყველა პარამეტრი, რათა მხვედრის სიჩქარე დაბალი იყოს, მათ შორის მანძილი და ტრაექტორია.

ტყვიის ზომა დაახლოებით 5 სანტიმეტრამდეა, ის დამზადებულია რეზინისგან და 5 გრამს იწონის.

რაკეტის ფორმის რეზინის ტყვიების აღწერაში მითითებულია, რომ სროლისას დენთის მარაგი ისე უნდა იქნეს შერჩეული, რომ ტყვიის სისწრაფე ლულიდან გამოსვლის მომენტში არ აღემატებოდეს 130 მეტრს წამში.

ონლაინ მაღაზია Firequest წერს, რომ მას შეუძლია გამოიწვიოს სერიოზული დაზიანება ან სიკვდილი, შედეგები კი დამოკიდებულია სროლის დისტანციაზე, სამიზნის სხეულის წონასა და იმაზე, თუ სად მოხვდა სამიზნეს ტყვია.

20 ივნისის მოვლენების შემდეგ, მედიკოსი სოფო ჭედია სოციალურ ქსელში წერდა, რომ ეს ტყვია არის მეტალის შემცველი, რასაც ერთერთი დაზარალებულის ტომოგრაფია ადასტურებს.