„მთავრობას არ გააჩნია ნდობის რესურსი, მისი ფუნქცია ამოწურულია და სახლში უნდა წავიდეს“

„მთავრობას არ გააჩნია ნდობის რესურსი, მისი ფუნქცია ამოწურულია და სახლში უნდა წავიდეს“ - დავით ჭიჭინაძე

პოლიტიკა - 18:05, 21 Jun, 2019

801

ისნის მაჟორიტარი, დამოუკიდებელი დეპუტატი დავით ჭიჭინაძე ქვეყანაში განვითარებული მოვლენების ფონზე, უმრავლესობის წევრებს მიმართავს და ეუბნება, რომ თუ მათ ოდნავ მაინც გააჩნიათ ღირსება, აღარ შეიძლება, უმრავლესობის წევრები იყვნენ.

„თუ შენ დეპუტატი გქვია, უნდა იდგე ხალხის მხარეს. ხალხი კი დღეს აღარაა „ოცნების“ მხარეს, რადგან ეს აღარ არის „ქართული ოცნება“, ეს კონკრეტული ჯგუფის ოცნებაა. დიდი ხანია, ვაფრთხილებდი ივანიშვილს, რომ კობახიძე მისთვის სერიოზული პრობლემა გახდებოდა, ისევე - როგორც კობახიძის გარემოცვა.

როდესაც არც მთავრობას და არც პარლამენტს არ გააჩნია არც ადამიანობის, არც ნდობის რესურსი და მათი ფუნქცია ამოწურულია, ისინი სახლში უნდა წავიდნენ!

ქუჩაში მიმდინარე პროცესების დაწყნარების ერთადერთი საშუალება კი ვადამდელი არჩევნებია.

კობახიძის გადაყენებით კრიზისი დაიწყო. ამას აუცილებლად უნდა მოყვეს სამთავრობო კრიზისი თუნდაც იმიტომ, რომ დღევანდელი მთავრობის ე.წ. ყველაზე დასაყრდენმა მინისტრმა, გახარიამ 20 ივნისის პროცესებს თავი ვერ გაართვა. მას ნერვებმა უმტყუვნა.

გუშინ იყო პროტესტი, მაგრამ ვერანაირად გავამართლებ იმას, რომ ზოგიერთი პოლიტიკური ჯგუფი შეეცადა თავის სასარგებლოდ მოეტრიალებინა სიტუაცია და სახალხო პროტესტი სახალხო რევოლუციად გადაექცია.

რადგან ხალხში არა არის რევოლუციის სურვილი. ხალხს არ აქვს მოთხოვნა, რომ „ნაცები“ და მისი განაყოფები დაბრუნდნენ ხელისუფლებაში და თუ ქვეყანაში დღეს პროცესები ფერხდება, ეს მხოლოდ „ოცნების“ და „ნაცმოძრაობის“ ერთმანეთში გარიგების შედეგია. „ნაცები“ ისევე აცოცხლებენ „ოცნებას“, როგორც თავის დროზე შევარდნაძე - აბაშიძეს.

რც უმთავრესია, ნებისმიერ დეპუტატს, რომელსაც ღირსება გააჩნია, შესაბამისი შეფასება უნდა მისცეს გუშინდელ მოვლენებს და ბოდიში მოიხადოს იმ ქმედებებისთვის, რაც ხელისუფლებამ თავისი მოქალაქეების, თუნდაც ჟურნალისტების მიმართ ჩაიდინა, - აცხადებს ჭიჭინაძე.