"ივანიშვილი აქციის მონაწილე ახალგაზრდების მოსყიდვას ცდილობს" - ბაჩუკი ქარდავა სუს-ის მიერ დაგეგმილ შესაძლო პროვოკაციაზე საუბრობს

პოლიტიკა - 15:40, 21 Jun, 2019

819

ბაჩუკი ქარდავამ დღეს გამართულ ბრიფინგზე ოპოზიციის მოთხოვნებსა და სამოქამედო გეგმაზე ისაუბრა.
"ჩვენი მოთხოვნებია, გახარია-კობახიძის გადადგომა და ვადამდელი პროპორციული არჩევნები. მინდა გავშიფრო რას ნიშნავს ვადამდელი პროპორციული არჩევნები. ეს ნიშნავს ბიძინა ივანიშვილის ხელისუფლების დასრულებას არჩევნების გზით. თუ ივანიშვილი ამ ნაბიჯს არ გადადგამს და პოლიტიკურ ნებას არ გამოავლენს, ქართველი ხალხი არასდროს შეეგუება იმას, რაც სურს ოლიგარქს - ხელისუფლების უზურპაცია"- დასძინა ქარდავამ.

ეროვნულ-დემოკრატიული პარტიის ლიდერის, ბაჩუკი ქარდავას განცხადებით, ივანიშვილმა აქციაში მონაწილე ახალგაზრდების მოსყიდვის ბრძანება გასცა.

როგორც ქარდავამ სპეციალურ ბრიფინგზე განაცხადა, სუს-ის მიერ ორგანიზებული ჯგუფები დღეს დაგეგმილი აქციის "ხელში ჩაგდებას" ცდილობენ.

"ივანიშვილმა გუშინ მიიღო გადაწყვეტილება და სოლიდური თანხები გამოყო ახალგაზრდების მოსასყიდად, მაგრამ მინდა ვუთხრა ივანიშვილს - შეიძლება ამ ქვეყანაში ყველაფერი იყიდოს, მაგრამ ქართველ ახალგაზრდებს "კიკუებად"ვერ აქცევს, მალე ქართველი ახალგაზრდები "გააკიკუებენ" ბიძინა ივანიშვილს, რადგან ის ადამიანები, რომლებიც აი აქ, რუსთაველის გამზირზე იბრძოდნენ საქართველოს დამოუკიდებლობისა და თავისუფლებისთვის, არ გაიყიდებიან. მიზანი და ამოცანა აქვსთ ერთი, რომ სუს-ის მიერ ორგანიზებულმა ჯგუფებმა რამენაირად ჩაიგდონ საპროტესტო აქცია დღეს, რასაც ისინი ვერ მოახერხებენ და დღეს 7 საათზე საპროტესტო აქცია იქნება საქართველოს პატრიოტების ხელში და ეს არ დასრულდება მანამ, სანამ ივანიშვილი ხელისუფლებას არ დატოვებს"- თქვა ქარდავამ.