„უნდა შეიცვალოს ეს მთავრობა“

„უნდა შეიცვალოს ეს მთავრობა“ - ნატო ჩხეიძე

პოლიტიკა - 15:32, 21 Jun, 2019

1055

„ეს შეცდომა კი არა, დანაშაულია, ჩვენ განრისხებულები ვართ“ - ეს განცხადება პარლამენტის დამოუკიდებელმა დეპუტატმა ნატო ჩხეიძემ პარლამენტის წინ გუშინ მიმდინარე აქციაზე გააკეთა და მთავრობის გადადგომა მოითხოვა.„მე საქართველოს დეპუტატი ვარ, დამოუკიდებელი დეპუტატი, იმ პარლამენტის წევრი, რომელიც დღეს შეურაცხყვეს - ქვეყნის მეორე პირის სავარძელში ჩვენი ქვეყნის დაქუცმაცების მოსურნე აქტიური მოქმედი პირი ჩასვეს.

მეც ისევე ვარ განრისხებული, როგორც თქვენ, აქ მოსული საქართველოს მოქალაქენი. აქ ითქვა, გაბრაზებულები ვართო; არა, ჩვენ ვართ განრისხებულები და ვერ მოვისმენთ მთავრობის განმარტებებს ამ დანაშაულის ახსნისათვის, რადგან ეს არის ეროვნული გრძნობების შეურაცხყოფა.

კახი კალაძემ თქვა, განვმარტავთ ამ შეცდომასო. შეცდომასო და არა - დანაშაულსო. მათ მიაჩნიათ, რომ შეუძლიათ, ყველა დანაშაული განმარტონ და ჩვენ მოვუსმენთ და დავიჯერებთ.

კონსტიტუციას ფეხქვეშ თელავენ და განმარტავენ, რატომ აკეთებენ ამას, უსამართლობას სჩადიან და განმარტავენ, ძალადობენ ადამიანებზე და განმარტავენ, თუ რატომ ძალადობენ, კორიფციაში არიან ჩართულები და ამას განმარტავენ; როცა არჩევნებს აყალბებდნენ, ესეც განმარტეს და ახლა ფიქრობენ, რომ ის დროც მოვიდა, განმარტონ, თუ რატომ უნდა გადავიქცეთ რუსეთის გუბერნიად.

ჩვენ ვართ განრისხებულები. ამ პარლამენტს არ აქვს მორალური უფლება, მართოს ქვეყანა. ამიტომ, პირველ ყოვლისა, უნდა გადადგეს კობახიძე, გახარია... უნდა შეიცვალოს ეს მთავრობა და მოვიდეს ის ხალხი, რომელსაც საქართველოს მოსახლეობა უყვარს,“ - განაცხადა დამოუკიდებელმა დეპუტატმა.