"ადგილობრივმა რადიკალებმა სხდომა შემაწყვეტინეს!"- პარლამენტის თავმჯდომარის სავარძლიდან გაგდებული გავრილოვი ურთიერთობების გამყარებაზე საუბრობს

პოლიტიკა - 15:01, 20 Jun, 2019

1638

სერგეი გავრილოვი, რომელიც ამჟამად სასტუმროში რედისონში იმყოფება, ამბობს, რომ გუშინდელი თბილი მიღების შემდეგ ასეთ დემარშს არ ელოდა. გავრილოვის თქმით, ის საქართველოში მართმადიდებლობასა და ქრისტიანულ სიყვარულზე სასაუბროდ ჩამოვიდა, საპასუხოდ კი პროტესტი მიიღო.

„ვთვლი, რომ ეს უვარგისი მცდელობა იყო საერთაშორისო მართლმადიდებლური ფორუმის ჩასაშლელად. ჩვენ ჩამოვედით იმ მიზნით, რომ გავამყაროთ ურთიერთობები კულტურისა და განვითარების სფეროში. მიმაჩნია, რომ ჩვენი მართლმადიდებლური კულტურა საკმარისი საფუძველია საპარლამენტთაშორისო კავშირების გასამყარებლად. ჩვენი ღონისძიება ტარდება მწვავე საკითხების განხილვის გარეშე. ვეძებთ ახალ გზებს, რომ ჩვენს მართლმადიდებელ ერებს შორის ურთიერთობა გაძლიერდეს. სამწუხაროდ, ჩემს შესახებ ფეიკ ნიუსებს ავრცელებენ. არასდროს მიმიღია მონაწილეობა საომარ მოქმედებებში არც აფხაზეთსა და არც სხვაგან. ცხელ წერტილებში ჩემი ვიზიტი მხოლოდ მიზნად ისახავდა კონფლიქტის შედეგად დაზარალებული ქრისტიანების დახმარებას სირიასა და კოსოვოშიც"- აცხადებს გავრილოვი და აღნიშნავს, რომ ადგილობრივმა რადიკალებმა მას სხდომა შეაწყვეტინეს წყალი შეასხეს და დოკუმენტების წართმევა სცადეს.

რუსმა დეპუტატმა გავრილოვმა პარლამენტის შენობა დაახლოებით 1 საათის წინ დატოვა. ის ამ დრომდე სასტუმრო რედისონში რჩება სადაც დაცვა გაძლიერებულია. როგორც რუსი დეპუტატები ამბობენ, მათ არ აქვთ გადაწყვეტილი, გაგრძელდება თუ არა ან სად გაგრძელდება ასამბლეა.

სასტუმრო რედისოის წინ აქცია მიმდინარეობს, შენობასთან ,,რუსეთი ოკუპანტიას'' წევრები და საზოგადოების წარმომადგენლები არიან შეკრებილები, რომლებიცკრემლის ინტერესების წარმომადგენლების საქართველოში ყოფნას აპროტესტებენ და მათ მიერ ქვეყნის დატოვებას მოითხოვენ.