"კონცეპტუალურად რომ შევხედოთ, რაღაც დონეზე საქართველოს სრული ოკუპაცია რუსეთის მხრიდან შემდგარია"- ექსპერტები საქართველოს ხელისუფლებას აფრთხილებენ

პოლიტიკა - 11:32, 19 Jun, 2019

1324

სერგეი გავრილოვისა და რუსი დეპუტატების ვიზიტს საქართველოში ექსპერტების მკაცრი შეფასებები მოჰყვა. მათი შეფასებით, ბოლოდროინდელი ტენდენცია ქვეყნის ინტერესებს დარტყმას აყენებს.

„სულ რამდენიმე კვირის წინ გაიმართა "რაშა თუდეის" და "სპუტნიკის" კონფერენცია საქართველოში, რომლებიც საკუთარ თავთან ბრძოლას ასწავლიდნენ ხალხს. რამდენიმე დღეა, დუგინის ძმაკაცი დარბის აქ და ახალ მხედრიონს აკეთებს, კონცეპტუალურად რომ შევხედოთ, რაღაც დონეზე საქართველოს სრული ოკუპაცია რუსეთის მხრიდან შემდგარია,“ - აცხადებს სტრატეგიული ანალიზის ცენტრის (GSAC) დამფუძნებელი ნოდარ ხარშილაძე.

რუსი დეპუტატების საქართველოში ვიზიტს სახელმწიფოებრივად დამაზიანებელს უწოდებს ექსპერტი ბათუ ქუთელიაც.

ქუთელიას განცხადებით, რუს პოლიტიკოსებს საქართველოში თავისუფალი სიტყვის ეგიდით ასპარეზი არ უნდა მიეცეს, რადგან ეს ქვეყნის ყველა მნიშვნელოვან ღირებულებას დააზიანებს.

"მხოლოდ საქართველოს დამოუკიდებლობის წინააღმდეგ კი არა, ეს ადამიანები ებრძვიან ზოგადად თავისუფალ სამყაროს წინააღმდე. იმიტომ რომ ეს ადამიანები, იმ ფრონტებზე, რომელიც რუსეთმა გაუხსნა თავისუფალ, დემოკრატიულ სამყაროს ძალიან აქტიურად იბრძვიან თავისუფალი სამყაროს წინააღმდეგ და რუსული აგრესიული რევიზიონიზმის ხელშესაწყობად.

ასეთი ადამიანების მიღება და მათთვის თავისუფალი სიტყვის მიცემის ეგიდით ფართო ასპარეზის მიცემა აზიანებს ჩვენს სუვერენიტეტს და აზიანებს იმ ეროვნული კონსენსუსის აშენების პროცესს, როდესაც რუსეთი იქნება განსაზღვრული ,როგორც მთავარი მტერი ჩვენი სახლემწიფოებრიობისა და ასევე აზიანებს დასავლურ ვექტორზე მხარდაჭერის ეროვნულ კონსენსუსს,“-აცხადებს ბათუ ქუთელია.

დღეს თბილისში მართლმადიდებლობის საპარლამენტო ასამბლეის სხდომა იმართება, რომელშიც რუსეთის ფედერაციის სახელმწიფო დუმის წევრები იღებენ მდგომარეობას.

ოპოზიციის ინფორმაციით, დუმის დეპუტატების საქართველოს ტერიტორიაზე შემოსვლა არასასურველია და ზიანს მიაყენებს როგორც ჩვენი ქვეყნის სუვერენიტეტს ასევე საერთაშორისო ავტორიტეტს.