"ოცნების უთავმოყვარეო, მოღალატეობრივი პოლიტიკა... საქართველოს ხელისუფლებამ რუსეთის წინაშე დაიჩოქა"- შაშკინი გავრილოვის ვიზიტზე

პოლიტიკა - 10:26, 19 Jun, 2019

1332

სერგეი გავრილოვისა და რუსი დეპუტატების ვიზიტი საქართველოში - თავდაცვის ყოფილი მინისტრი, დიმიტრი შაშკინი "ნიუპოსტთან" ამბობს, რომ საქართველოს ხელისუფლებამ ოკუპანტი რუსეთის წინაშე დაიჩოქა.

მისი შეფასებით, ივანიშვილის ხელისუფლება უთავმოყვარეო საგარეო პოლიტიკას ატარებს.

"ჩემი შეფასება რა თქმა უნდა არის მძიმე. ბოლო 7 წლის განმავლობაში, ყველანი ვხედავთ, აბსოლუტურად უთავმოყვარეო საგარეო პოლიტიკას, რომელსაც ბიძინა ივანიშვილის ხელისუფლება აწარმოებს. "ქართული ოცნება" ხელისუფლებაში მოვიდა ლოზუნგით, რომ დაალაგებდა ურთიერთობებს რუსეთთან. ბუნებრივია, ეს დაპირება იყო ბლეფი, როგორც სხვა დანარჩენი. რუსეთთან ურთიერთობის დალაგების ნაცვლად, ჩვენ მივიღეთ უთავმოყვარეო, მოღალატეობრივი პოლიტიკა.
რუსეთი თავის სათქმელს ღიად გვეუბნება: აფხაზეთს არ დაგიბრუნებ, ცხინვალს არ დაგიბრუნებ, ანაკლიის პორტი არ ააშენო. აფხაზეთში რკინიგზა გახსენი, დაიჩოქე, დაიჩაგრე და მერე მე დაგელაპარაკები იმაზე, კიდევ გაგინო და ჩაგარტყა თუ არა.
თუ რუსეთის ეს მარტივი ლოგიკა არ გესმის, მაშინ საერთოდ რა გესაქმება ხელისუფლებაში და მთვრობაში.
"ქართული ოცნება" ცდილობს რუსეთის ეს ღია ტექსტი ვერ გაიგოს და ატარებენ ქვეყნისთვის დამაზიანებელ, მოღალატეობრივ პოლიტიკას. მსოფლიოს რადარებიდან ხომ გაგვაქრეს, მსოფლიოს მასშტაბით არავინ საუბრობს იმაზე, რომ ჩვენი ტერიტორიები ოკუპირებულია. საუბრობენ უკრაინაზე და არა საქართველოზე"- აღნიშნა შაშკინმა.

ყოფილი მაღალჩინოსანი ამბობს, რომ გავრილოვის და რუსი დეპუტატების საქართველოში ჩამოსვლა მხოლოდ იმაზე მეტყველებს, რომ საქართველოს ხელისუფლებას თავმოყვარეობა არ გააჩნია.

"სიურეალიზმში ვართ, კომუნისტური პარტიის ლიდერი ჩამოდის მართმადიდებლურ ფორუმზე. პარტიის რომელიც ანგრევდა ტაძრებს. რომელმაც ათი ათასობით მღვდელი დახვრიტა. მათი ბელადი ახლაც წითელ მოედანზე წევს. საქართველოს ხელისუფლებამ კი დაიჩოქა რუსეთის წინაშე"- უთხრა "ნიუპოსტს" დიმიტრი შაშკინმა.