კომბლებით მუქარა პოლიციელების მიმართ - ადვოკატთა ასოციაცია ვასაძის ლეგიონერი იურისტის განცხადებას პასუხობს

პოლიტიკა - 21:21, 18 Jun, 2019

1023

ლევან ვასაძის დაჯგუფების ერთ-ერთი წარმომადგენლის, ადვოკატ დავით ცინცქილაძის მიერ სამართალდამცავების მისამართით გამოთქმულ მუქარას, რომლის თანახმადაც იურისტი ამბობს, რომ პოლიციის მიმართ კომბალს იმ შემთხვევაში გამოიყენებენ, თუ წესრიგის დაცვას ვერ მოახერხებენ, ადვოკატთა ასოციაცხია საგანგებო განცხადებით პასუხობს, რომელსაც უცვლელად გთავაზობთ:

"ადვოკატთა ასოციაციის მიმართვა სსკ 223-ე მუხლით მიმდინარე გამოძიების საქმეზე ადვოკატის მიერ გავრცელებულ საჯარო განცხადებასთან დაკავშირებით:

ადვოკატის საქმიანობა ეფუძნება კანონიერების, სამართლის უზენაესობისა და კლიენტის უფლებების დაცვის პრინციპებს. ამასთან, ადვოკატს, როგორც საჯარო ფუნქციის მატარებელ სუბიექტს, გააჩნია განსაკუთრებული როლი მართლმსაჯულების სწორად და სამართლიანად განხორციელების პროცესში.

აღნიშნული პრინციპების განუხრელი დაცვა კიდევ უფრო მეტ მნიშვნელობას იძენს ისეთი მაღალი საჯარო ინტერესის მქონე საქმეებში, რომელმაც, შესაძლოა, საზოგადოებაში დაძაბულობისა და დაპირისპირების საფრთე შექმნას.

მართალია, კლიენტის საუკეთესო ინტერესების წარმოდგენისას ადვოკატი სარგებლობს სტრატეგიის შერჩევისა და დაცვითი სიტყვის თავისუფლების მაღალი სტანდარტით, მაგრამ თითოეულმა ადვოკატმა თავისი ფუნქციების განხორციელებისას თავი უნდა შეიკავოს ისეთი განცხადებებისაგან, რომელმაც შესაძლოა, ხელი შეუშალოს საზოგადოებრივი უსაფრთხოებისა და საჯარო წესრიგის დაცვის ინტერესებს, დააზიანოს იურიდიული პროფესიის რეპუტაცია და გამოიწვიოს ადვოკატის კლიენტთან გაიგივება.

მოვუწოდებთ ასოციაციის წევრებს, კონკრეტულ საქმეებზე საადვოკატო საქმიანობის განხორციელებისას, განსაკუთრებული სიფრთხილით მოეკიდონ საჯაროდ გაკეთებულ განცხადებებს, დაიცვან ზემოაღნიშნული პრინციპები და არ გასცდნენ ადვოკატის როლს"- ნათქვამია განცხადებაში.