"ერთი საავადმყოფოს მართვა საკმარისი უნარი არ არის"- ივანიშვილი ჯანდაცვის მინისტრად ისევ თავის ოჯახის ექიმს ნიშნავს

პოლიტიკა - 13:09, 17 Jun, 2019

2845

გაერთიანებული ოპოზიცია "ძალა ერთობაშიას" წევრი, "ნაციონალური მოძრაობის" ერთ-ერთი ლიდერი ლევან ბეჟაშვილი თვლის, რომ ჯანდაცვის სფეროში არსებულ მძიმე მდგომარეობას თანამდებობიდან მინისტრ სერგეენკოს გაშვება ვერ მოაგვარებს.
როგორც "ნიუპოსტს" ბეჟაშვილმა განუცხადა, თავის დროზე ივანიშვილის ოჯახის ექიმის მინისტრის პოსტზე დანიშვნა სუბიექტური მოსაზრებით იყო ნაკარნახები.
"პრაქტიკულად ივანიშვილის ოჯახის წევრის, მის ოჯახის ექიმის ჯანდაცვის მინისტრად დანიშვნა, ვფიქრობ, უკვე არასერიოზულად მეტყველებს ამ გადაწყვეტილებაზე. ჯანდაცვის სისტემაში უამრავი პრობლემა დაგროვდა. ერთ დროს ყველაზე წარმატებული სფერო "ქართული ოცნების" ხელისუფლების პირობებში უკვე კარგავს პოზიციებს. დღითი-დღე იზრდება საზოგადოებაში უკმაყოფილება. უფრო მეტი სახელმწიფო ვალი გროვდება საავადმყოფოების მიმართ. ძალიან ბევრი პაციენტი გამოხატავს უკმაყოფილებას. ამიტომ სერგეენკოს გათავისუფლება პრობლემებს ვერ გადაწყვეტს"- განაცხადა ლევან ბეჟაშვილმა.

ოპოზიციის წარმომადგენელი დავით სერგენკოს შესაძლო შემცველზე ეკატერინე ტიკარაძეზეც საუბრობს. როგორც მან "ნიუპოსტს" უთხრა, საზოგადოება აღნიშნულ პიროვნებას არ იცნობს:
"არამგონია სამედიცინო საზოგადოება ამ ფაქტს დადებითად შეხვდეს. ჯანდაცვის სფეროში ძალიან ბევრი ადამიანია, რომლებიც გამოირჩევა თავისი პროფესიონალიზმითა და გამოცდილებით და ბევრად უფრო ეფექტურად შეძლებდა ჯანდაცვის სფეროში არსებული პრობლემების გადაჭრა. სუბიექტური ინტერესებიდან გამომდინარე მიღებული გადაწყვეტილება დარწმუნებული ვარ, სისტემაზე დადებითად არ იმოქმედებს. ჩვენ არ ვიცით ამ ადამიანს რა გამოცდილება და რა შეხედულებები აქვს, როგორ შეუძლია სისტემის მართვა. ის რომ ლოკალურად ერთ-ერთ საავადმყოფოს მართავ, ეს საკმარისი უნარი არ არის იმისთვის, რომ მინისტრის პოსტი დაიკავო"- აღნიშნა ლევან ბეჟაშვილმა.