„ეს ხალხი სჭირდებათ შავ-ბნელი საქმეების გაკეთებაში“ - პრეზიდენტმა პოლიტპატიმრების საქმისა და "კაბელების საქმის" პროკურორები ღირსების ორდენით დააჯილდოვა

პოლიტიკა - 10:25, 14 Jun, 2019

1581

საქართველოს პრეზიდენტმა პროკურატურის თანამშრომელთა პროფესიულ დღეს 4 პროკურორი ღირსების ორდენით დააჯილდოვა. დაჯილდოვებულთა შორის არიან ნინო აღლემაშვილი, რევაზ ბაღაშვილი, გიორგი გოგაძე და ფრიდონ ქარცივაძე.

პრეზიდენტის განცხადებით მათ ჯილდო დამოუკიდებელი ქართული სახელმწიფოს აღმშენებლობისა და კანონიერებისა და მართლწესრიგის განმტკიცების საქმეში შეტანილი განსაკუთრებული წვლილისათვის გადაეცათ.

პროკურორების დაჯილოდების საკითხმა საზოგადოებაში კითხვები გააჩინა იმასთან დაკავშირებით თუ რა დამსახურებისთვის მიიღეს მათ ღირსების ორდენები, ყველაზე მეტი კითხვა ფრიდონ ქარცივაძესა და ნინო აღლემაშვილთან დაკავშირებით დაისვა.

ფრიდონ ქარცივაძე სახელმწიფო ბრალმდებელი იყო 2011 წელს „ბათუმის მაისის მოვლენების საქმეში“. პირები რომელთა წინააღმდეგაც ბრალმდებელი ქაცივაძე გამოდიოდა 2013 წელს პარლამენტმა პოლიტიკურ პატიმრებად შეაფასა და ციხიდან გაუშვა.

რაც შეეხება ნინო აღლემაშვილს ის ბოლო პერიოდის ერთ-ერთი ყველაზე რეზონანსული „კაბელების საქმის“ ბრალდების მხარე იყო.

„კაბელების საქმის“ ადვოკატი ლევან სამუშია ხელისუფლებას უკანონობის წახალისებაში ადანაშაულებს.

„კაბელების საქმის პროკურორი დაჯილდოებულია ღირსების ორდენით, ასევე ის პროკურორი და ის საქმე, სადაც "ქართულმა ოცნებამ" თქვა, რომ პოლიტპატიმრები ჰყავდათ, იმ საქმის პროკურორი დაჯილდოებულია ღირსების ორდენით. მე არ გამოვრიცხავ, რომ ცოტა ხანში ლევან მურუსიძეც იქნას დაჯილდოებული ღირსების ორდენით, ვინაიდან ბატონმა ივანიშვილმა ის არაფორმალურად უკვე დააჯილდოვა და მას გმირი უწოდა. ეს ხალხი მათ სჭირდებათ, სჭირდებათ იმ შავ-ბნელი საქმეების გაკეთებაში, რასაც ისინი ემსახურებოდნენ.“- განაცხადა სამუშიამ.