ფასადური ცვლილებები საარჩევნო სისტემაში თუ რეალური რეფორმა - ოპოზიცია მმართველ გუნდთან შეხვედრაზე დღეს კონკრეტული მოთხოვნით მივიდა. ხელისუფლების ოპონენტები 2020 წლის საპარლამენტო არჩევნების სრულად პროპორციული სისტემით ჩატარებას ითხოვენ. პარლამენტში საარჩევნო რეფორმაზე მომუშავე ჯგუფის შეხვედრა ამ წუთებშიც მიმდინარეობს, თუმცა ის პროტესტის ნიშნად „ევროპულმა საქართველომ“ და "ნაციონალურმა მოძრაობამ" დატოვა.

„თუ ხელისუფლება გადაწყვეტს ჯიუტად, რომ თავი აარიდოს ამ ფუნდამენტური საკითხის განხილვას, რომელზეც თანხმდება აბსოლუტურად ყველა, „ქართული ოცნების“ გარდა, რომ ეს არის მნიშვნელოვანი, მაშინ შესაძლოა ამ ფორმატში მუშაობამ დაკარგოს აზრი. არ ვიცით, ხელისუფლება რას აპირებს, დღევანდელ შეხვედრაზე, სანამ დავტოვებდი ამ შეხვედრას კიდევ ერთხელ შევთავაზე ხელისუფლებას, რომ დღის წესრიგში დარჩეს ეს საკითხი, არ მოხსნან დღის წესრიგიდან, რადგან ყველა თანხმდება, რომ ეს არის ფუნდამენტური რეფორმა რაც უნდა განხორციელდეს, თუ ხელისუფლებას სურს იმაზე საუბარი, რომ რეალური რეფორმა განხორციელდა საარჩევნო თვალსაზრისით. თუ სურთ, რომ კოსმეტიკური ცვლილებები მიიღოს, მეორეხარისხოვან საკითხებზე იმსჯელონ ამ ჯგუფში, ჩვენი პოლიტიკური მოძრაობა და ეჭვი მაქვს, რომ სხვა ოპოზიციური პოლიტიკური პარტიებიც ვერ დაინახავენ აზრს, რომ ამ ფასადური ცვლილებების ნაწილი გახდნენ,“- აცხადებს თინა ბოკუჩავა.