"თუ ხელისუფლება ძალაუფლების უზურპაციის გზას აირჩევს, გამოყენებული იქნება პოლიტიკური პროტესტის სხვა ფორმები" - ბაჩუკი ქარდავა საარჩევნო სისტემის ცვლილებაზე

პოლიტიკა - 12:03, 13 Jun, 2019

946

20-მა ოპოზიციური პარტიამ მაჟორიტარული საარჩევნო სისტემის გაუქმებისა და მთლიანად პროპორციულ სისტემაზე გადასვლის მოთხოვნით, საქართველოს პარლამენტში მოქალაქეების ხელმოწერები შეიტანა. საინიციატივო ჯგუფის მოთხოვნაა, რომ 2020 წლის არჩევნებისთვის მოხდეს სრულად პროპორციულ სისტემაზე გადასვლა.გაერთიანებული ოპოზიციის ერთ-ერთი ლიდერის, ედპ-ს თავმჯდომარის, ბაჩუკი ქარდავას თქმით, ახლა ბურთი ხელისუფლების მოედანზეა და მან უნდა მიიღოს გადაწყვეტილება და არჩევანი გააკეთოს დემოკრატიულ განვითარებასა და ძალაუფლების უზურპაციას შორის, მეორე არჩევანის შემთხვევაში კი, ოპოზიცია პოლიტიკური პროტესტის სხვა ფორმების გამოყენებას გეგმავს.

„ჩვენ შევიტანეთ 250 ათასი ხელმოწერა, ამ წუთიდან უკვე იწყება დროის ათვლა, როდესაც საპროცედურო კომიტეტმა უნდა მიიღოს გადაწყვეტილება დანიშნოს საყოველთაო საჯარო განხილვები მთელი ქვეყნის მასშტაბით, დანიშნოს საკომიტეტო მოსმენები და შემდეგ შეიტანოს პლენარული სხდომის დღის წესრიგში. ახლა ბურთი ხელისუფლების მოედანზეა და მათ უნდა მიიღონ გადაწყვეტილება.ვნახავთ გამოავლენს თუ არა ბიძინა ივანიშვილი პოლიტიკურ ნებას, რომ ქვეყანაში ჩაატაროს პროპორციული კონკურენტული არჩევნები, თუ არა და ოპოზიცია, რომელიც არის სრულად კონსოლიდირებული ამ საკითხის გარშემო მზადაა ბრძოლა გააგრძელოს და ის კამპანია, რომელიც მოიცავს მილიონი ხელმოწერის შეგროვებას და საზოგადოების დარაზმვას, რა თქმა უნდა გრძელდება. გარდა ამ ხელმოწერებისა ჩვენ ჩვენს არსენალში გვაქვს გარკვეული ღონისძიებები, ეს შეიძლება იყოს პოლიტიკური პროტესტის სხვა ფორმები რაც კონსტიტუციით არის გათვალისწინებული, ეს იმ შემთხვევაში თუ ხელისუფლება დემოკრატიული განვითარების ნაცვლად აირჩევს ძალაუფლების უზურპაციის გზას.“- განაცხადა ბაჩუკი ქარდავამ.