რა გახდა გარდაბანში ორი მოხუცის სასტიკი მკვლელობის მოტივი და უკავშირდება თუ არა უმძიმესი დანაშაული გარდაცვლილთა შვილის კონქლიქტს ე.წ. კრიმინალურ ავტორიტეტებთან? - ეს ის კითხვებია, რომელზეც გამოძიებას პასუხის გაცემა მოუწევს.

მუსაევები საკუთარ სახლში ხუთი დღის წინ მოკლეს და კედელზე წარწერაც დატოვეს - „ედიკ, გელოდებით.“

მუქარის ადრესატი ირწმუნება, რომ მტრები არ ჰყავს და არც ბიზნეს ინტერესები გააჩნია. მუსაევი კატეგორიულად უარყოფს ამ საქმეში „კანონიერი ქურდების“ ჩართვას.

„აგიხსენით, რომ მტრები არ მყავს. რაც შეეხება ამ ტრაგედიას, ვინც ეს ჩაიდინა, არც დედის და არც მამის ფასი იცის. ყველაზე მეტად იმაზე ვწუხვარ, რომ კარზე ჩემი სახელი იყო დაწერილი. არ ვიცი, რატომ დაწერეს. ალბათ, კვალის დაფარვის მიზნით. რაც შეეხება სახლიდან ფულის წაღებას, ასეთი ფაქტი იყო, მაგრამ ზუსტად არაფერი ვიცი. მე ბიზნესი არ მაქვს. ჩემი ძმები კი ძველი მანქანების გაყიდვით არიან დაკავებულები. პოლიციამ მეც დამკითხა, როგორც სხვები, სხვა ვერაფერს გეტყვით,“ - განაცხადა „კურიერთან“ მოკლული მოხუცების შვილმა, ედიკ მუსაევმა.

მოკლულების მეზობლი ერთ საინტერესო დეტალს იხსენებს და ამბობს, რომ ედიკ მუსაევს სხვა სოფელში კონფლიქტი მოუხდა, მისი მეგობარი კი დაჭრეს.

„მოკლულების შვილებთან ერთად ვარ გაზრდილი. ძალიან კარგი ხალხია და არც მტრები ჰყავთ. გაოცებულები ვართ, ეს როგორ მოხდა, ან ვინ და რატომ ჩაიდინა. სამართალდამცველების იმედი გვაქვს, ალბათ, მალე დაიჭერენ. ამ საქმეში კრიმინალური ავტორიტეტები იყვნენ თუ არა ჩართული, ამის შესახებ ვერაფერს გეტყვით. ერთადერთი რაც ვიცი, არის ის, რომ მოკლულების შვილმა ედიკამ სოფელ ქოსალარში, დაახლოებით, ერთი თვის წინ იჩხუბა და მისი მეგობარი დაჭრეს, თუმცა არ მჯერა, რომ ეს ჩხუბი შეიძლება კავშირში იყოს ამ ტრაგედიასთან,“ - განაცხადა მოკლულების მეზობელმა.