"იმედი გვაქვს, საქართველო ბოლომდე მიიყვანს პორტის პროექტს" - აშშ-ის სახელმწიფო მდივანი ანაკლიის პორტის საკითხს გამოეხმაურა

პოლიტიკა - 21:13, 11 Jun, 2019

1198

თეთრ სახლში დასრულდა შეხვედრა ამერიკის შერთებული შტატების სახელმწიფო მდივან მაიკ პომპეოსა და საქართველოს პრემიერმინისტრ მამუკა ბახტაძეს შორის. შეხვედრის დასრულების შემდეგ მათ პრესისთვის საგანგებო განცხადებები გააკეთეს. აშშ-ს სახელმწიფო მდივანმა ბრიფინგზე იმედი გამოთქვა, რომ საქართველო ბოლომდე მიიყვანს ანაკლიის პორტის პროექტს. პომპეოს თქმით, პორტი გააღრმავებს საქართველოს ურთიერთობას თავისუფალ ეკონომიკასთან და თავიდან აარიდებს რუსულ და ჩინურ ეკონომიკურ ზეგავლენას.

„მე გამოვხატე ჩვენი იმედი, რომ საქართველო ბოლომდე მიიყვანს პორტის პროექტს. პროექტი გააძლიერებს საქართველოს ურთიერთობას თავისუფალი ეკონომიკის მქონე ქვეყნებთან და დაიცავს მას რუსეთისა და ჩინეთის ეკონომიკური გავლენისგან. ის მოჩვენებითი მეგობრები საქართველოს ინტერესებს არ ითვალისწინებენ. საქართველოს განვითარება, როგორც თავისუფალი სახელმწიფოს, საბჭოთა კომუნიზმის თითქმის საუკუნოვანი გავლენის შემდეგ, ამტკიცებს, რომ ის სწორ გზაზე დგას. ჩვენ ვამაყობთ, რომ ამ გზაზე თქვენი კარგი პარტნიორები ვართ.“- განაცხადა მაიკ პომპეომ.