გორის პოლიციის თანამშრომლებმა შიდა ქართლის საინფორმაციო ცენტრის ჟურნალისტ საბა წიწიკაშვილს ფიზიკური შეურაცხყოფა მიაყენეს და პროფესიულ საქმიანობაში ხელი შეუშალეს.

„ნიუპოსტის“ კორესპონდენტის ცნობით, შემთხვევა წუხელ, გვიან ღამით, ცენტრალურ საავტომობილო მაგისტრალზე, მდინარე ლიახვის ხიდზე იმ დროს მოხდა, როდესაც ჟურნალისტი ავტოსაგზაო შემთხვევას აშუქებდა.

,,როგორც კი გადმოვედი მანქანიდან, ჩემსკენ წამოვიდნენ. ვცადე იმ ადგილამდე მისვლა, საიდანაც ხილვადობა კარგი იყო. ბორდიურსა და მანქანებს შორის მივდიოდი. თავს 10-მდე პოლიციელი დამესხა. ერთმა ტელეფონის წართმევა სცადა, მეორემ ხელი მკრა და ბეჭებში ჩამარტყა. დანარჩენებმა ძალის გამოყენებით დამატოვებინეს ტერიტორია. ამის შემდეგ წამოვედი, ავტობანის მეორე მხარეს გადავედი გვირაბთან შემოვუარე და მეორე ხიდიდან დავიწყე გადაღება. მეორე ხიდზე ვეღარ მომიახლოვდებოდნენ. ხიდიდან ხიდზე ვერ გადმოხტებოდნენ. " - აცხადებს ჟურნალისტი საბა წიწიკაშვილი.

მისივე თქმით, ხელშეშლის და ფიზიკური შეურაცხყოფის ფაქტის ამსახველი მასალა გენერალურ ინსპექციას წარედგინება.