"ერთ მხარეს არის უძრაობა, უპერსპექტივობა, ზიზღსა და დაპირისპირებაზე აგებული პოლიტიკა, მეორე მხარეს კი შანსი, შევცვალოთ ეს ყველაფერი"

"ერთ მხარეს არის უძრაობა, უპერსპექტივობა, ზიზღსა და დაპირისპირებაზე აგებული პოლიტიკა, მეორე მხარეს კი შანსი, შევცვალოთ ეს ყველაფერი" - დავით ბაქრაძე

პოლიტიკა - 08:55, 09 Jun, 2019

670

ევროპული საქართველოს ერთ-ერთმა ლიდერმა, დავით ბაქრაძემ მთაწმინდის საარჩევნო ოლქში საკუთარი არჩევანი უკვე გააკეთა. ბაქრაძემ ხმა #27 საარჩევნო უბანზე მისცა.
დავით ბაქრაძის განცხადებით, მთაწმინდელებისთვის დღეს არის თვალსაჩინო და ნათელი არჩევანი - ერთ მხარეს არის უძრაობა და უპერსპექტივობა, მეორე მხარეს კი შანსი, შევცვალოთ ეს ყველაფერი.

„ჩვენი ამომრჩევლისთვის არის ძალიან თვალსაჩინო და ნათელი არჩევანი. ერთ მხარეს არის უძრაობა, უპერსპექტივობა, ზიზღზე, დაპირისპირებაზე და წარსულის ნგრევაზე აგებული პოლიტიკა, ხოლო მეორე მხარეს არის შანსი შევცვალოთ ეს ყველაფერი, წავიყვანოთ ქვეყანა წინ და ავირჩიოთ პარლამენტში ადამიანი, რომელიც მართლაც გამორჩეული იქნება საკუთარი წესიერებით და პროფესიონალიზმით.

ამიტომ ვფიქრობ, რომ არჩევანი არის სრულიად ნათელი და გასაგები. ბუნებრივია მე მხარი დავუჭირე ცვლილებებს, უკეთესობას და მხარი დავუჭირე პარლამენტში ადამიანს, რომელის პროფესიონალიზმი, კეთილშობილება და პატიოსნება ნამდვილად გამოადგება მთაწმინდელებს და არა მხოლოდ მთაწმინდელებს“,- განაცხადა დავით ბაქრაძემ.

მისივე თქმით, "ქართული ოცნების სტილია, რომ არჩევნების დღემდე ხდება უბნების დალაგება" და მსგავს ფაქტებს მეორე ტურამდეც ჰქონდა ადგილი.

"ქართული ოცნების საფირმო სტილია, რომ არჩევნების დღემდე ხდება უბნებზე სიტუაციის "დალაგება" და ეს "დალაგება" მიმდინარეობდა ამჯერადაც. ჩვენ გვქონდა წინასწარი ინფორმაცია ამომრჩეველზე ზეწოლის, მათზე სხვადასხვა არაკანონიერი ან ნახევრად კანონიერი მეთოდების გამოყენებით მუშაობის. წინა დღეებში ეს ინფორმაცია იყო და მედია და საზოგადოება ამ ინფორმაციას იღებდით.

რაიმე განსაკუთრებულ გართულებას უბნებზე დღეს არ ველოდებით. მე იმედი მაქვს, რომ ყველა ის ადამიანი, ვისთანაც წინა დღეებში ქართული ოცნება მუშაობდა და ცდილობდა, დარწმუნებინა ხმის მისაცემად, მოვა და ყველას გაახსენდება, რომ ცხოვრება არ შედგება არჩევნებამდე 3 დღისგან. ცხოვრება შედგება წლებისგან, როდესაც ქართულ ოცნებას არაფერი გაუკეთებია მათთვის, მათი ცხოვრების გაუმჯობესებისთვის და იმედი მაქვს, ყველა ეს ადამიანი მხარს დაუჭერს ცვლილებებს", - თქვა ბაქრაძემ.