რაც შეიძლება მეტნი უნდა მოვიდეთ არჩევნებზე, მხოლოდ ეს არის გამარჯვების გასაღები

რაც შეიძლება მეტნი უნდა მოვიდეთ არჩევნებზე, მხოლოდ ეს არის გამარჯვების გასაღები - შავგულიძე

პოლიტიკა - 18:50, 08 Jun, 2019

780

მთაწმინდაზე, სულხან საბას სკვერში აქცია-კონცერტი "ყველა ხმას აქვს აზრი" იმართება. ზურა ჯავახია და ჯგუფი "მარტივი გამოსავალი" ამ ფორმით მთაწმინდის ამომრჩეველს ხვალ არჩევნებზე აქტიურობისკენ მოუწოდებენ. კონცერტზე ბლოკი "ევროპული საქართველო თავისუფალი დემოკრატების" მაჟორიტარი დეპუტატობის კანდიდატ შალვა შავგულიძესთან ერთად მისი წარმდგები პარტიის წევრები და სხვა ოპოზიციური პარტიის წარმომადგენლებიც იმყოფებიან, მათ შორის სანდრა რულოვსი და დავით ბერძენიშვილი.

"თავისუფალი დემოკრატები - ევროპული საქართველოს" მაჟორიტარობის კანდიდატი შალვა შავგულიძე ამომრჩევლებს აქტიურობისკენ მოუწოდებს. მისი განცხადებით, თუ მოსახლეობა მასშტაბურად მივა არჩევნებზე, ხელისუფლება შედეგების გაყალბებას ვერ შეძლებს:

„არჩევნები, ეს მართლაც არის უმნიშვნელოვანესი დემოკრატიული პროცესი, რა დროსაც ხალხი უშუალოდ ირჩევს ხელისუფლების წარმომადგენლებს და მთაწმინდაზე ხვალ ასეთი დღეა. რაც შეეხება მოლოდინებს, მინდა, მივმართო მთაწმინდის ოლქის ამომრჩეველს, სწორედ, ამ მოლოდინიდან გამომდინარე, რომ ვისაც მიგვაჩნია,საჭიროა ივანიშვილის ხელისუფლების შეცვლა, არ ვართ წინააღმდეგინი, რომ ეს მთაწმინდის საარჩევნო ოლქიდან დაიწყოს, ამისთვის ამ ნების გამოხატვაა საჭირო. ხვალ, არჩევნების დღეს, რაც შეიძლება მეტნი უნდა მოვიდეთ არჩევნებზე და დავაფიქსიროთ ჩვენი პოზიცია. აი, მხოლოდ ეს არის გამარჯვების გასაღები, რაც შეიძლება მეტი ამომრჩეველი უნდა მოვიდეს არჩევნებზე. ასეთ შემთხვევაში ხელისუფლება ვერ შეძლებს იმ რაღაც მაქინაციებით აი ამ მასიურად გამოხატული ხალხის ნების განეიტრალებას. ”- განაცხადა შალვა შავგულიძემ.

შეგახსენებთ, ხვალ მთაწმინდის ოლქში პარლამენტის მაჟორიტარი დეპუტატის არჩევნების მეორე ტური გაიმართება, რომელშიც ერთმანეთს ხელისუფლების კანდიდატი ლადო კახაძე და ბლოკი “ევროპული საქართველო - თავისუფალი დემოკრატების” კანდიდატი შალვა შავგულიძე დაუპირისპირდებიან. პირველ ტურში ლადო კახაძემ 41.01% ხოლო შალვა შავგულიძემ 36.84% მიიღო.