ცენტრალურ საარჩევნო კომისია ადასტურებს, რომ მთაწმინდის არჩვენების მეორე ტურისთვის გადასატანი ყუთით მოსარგებლეთა რაოდენობა დაახლოებით 200 ადამიანითაა გაზრდილი:

„არჩევნების ჩასატარებლად სრულ მზადყოფნაშია ოცდათერთმეტივე საარჩევნო უბანი, სადაც ჯამში რეგისტრირებულია 43 909 ამომრჩეველი. გადასატანი ყუთის მოთხოვნით, ამომრჩეველს აქვს უფლება განცხადებით მიმართოს შესაბამის საუბნო საარჩევნო კომისიას. თუკი ამომრჩეველი რეგისტრირებულია გადასატანი ყუთის საარჩევნო სიაში, რომც მივიდეს საარჩევნო უბანზე, ის არჩევნებში მონაწილეობას ვერ მიიღებს, რადგან მან ხმა აუცილებლად გადასატანი საარჩევნო ყუთის საშუალებით უნდა მისცეს. დაახლოებით, 200 ადამიანით არის გაზრდილი სია, თუმცა 3%-ზე მაღალი მაჩვენებელი არ არის, შესაბამისად, ეს არ არის კანონდარღვევა“, - განაცხადა საქართველოს ცენტრალური საარჩევნო კომისიის სპიკერმა, ანა მიქელაძემ.

"ევროპული საქართველო - თავისუფალი დემოკრატების" წევრებმა ეს ინფორმაცია გუშინ გაასაჯაროვეს და განაცხადეს, რომ ამ ფორმით ხელისუფლების კანდიდატის სასარგებლოდ, ხმების დამატებითი მობილიზება იგეგმება.

შეგახსენებთ, ხვალ მთაწმინდის ოლქში პარლამენტის მაჟორიტარი დეპუტატის არჩევნების მეორე ტური გაიმართება, რომელშიც ერთმანეთს ხელისუფლების კანდიდატი ლადო კახაძე და ბლოკი “ევროპული საქართველო - თავისუფალი დემოკრატების” კანდიდატი შალვა შავგულიძე დაუპირისპირდებიან. პირველ ტურში ლადო კახაძემ 41.01% ხოლო შალვა შავგულიძემ 36.84% მიიღო.