"ანაკლიის ღრმაწყლოვანი პორტი იყო, არის და იქნება სტრატეგიული პრიორიტეტი სახელმწიფოსთვის და ეკონომიკის სამინისტროსთვის"

"ანაკლიის ღრმაწყლოვანი პორტი იყო, არის და იქნება სტრატეგიული პრიორიტეტი სახელმწიფოსთვის და ეკონომიკის სამინისტროსთვის" - თურნავა

პოლიტიკა - 14:16, 07 Jun, 2019

717

ეკონომიკის მინისტრმა პარლამენტში კომიტეტების გაერთიანებულ სხდომაზე ანაკლიის პორტთან დაკავშირებულ თემებზე ისაუბრა და განაცხადა, რომ ანაკლიის ღრმაწყლოვანი პორტი იყო, არის და იქნება სტრატეგიული პრიორიტეტი სახელმწიფოსთვის და ეკონომიკის სამინისტროსთვის. ეკონომიკის უწყების ხელმძღვანელის თქმით, აღნიშნულ საკითხთან დაკავშირებით ბოლო პერიოდში სპეკულაციები მიმდინარეობს, რეალურად კი სახელმწიფოს მსგავსი სახის მხარდაჭერა, როგორიც აქვს ანაკლიის პორტს, არც ერთ ინფრასტრუქტურულ პროექტს არ ჰქონია.

"ანაკლიის ღრმაწყლოვანი პორტი იყო, არის და იქნება სტრატეგიული პრიორიტეტი სახელმწიფოსთვის და ეკონომიკის სამინისტროსთვის, ამას ჩვენ ვადასტურებთ საქმით. ჩამოვთვლი იმ მხარდაჭერის ელემენტებს, რასაც ჩვენ ვთავაზობთ ანაკლიას, როგორც პროექტს და ვთავაზობთ კერძო ინვესტორს. ეს არის 100 მლნ დოლარის სუბორდინირებული სესხი, რომელსაც მიიღებს კომპანია, როგორც კი თავის წილ ვალდებულებებს შეასრულებს ინვესტორი. ეს არის 300 მლნ ლარის ინფრასტრუქტურული პროექტები, რომელთა განხორციელებაც უკვე დაწყებულია. ეს არ არის მხოლოდ დაპირება, არის კონკრეტული ვალდებულება, ეს არის მოქნილი ვადები. პირველი ვადა „ანაკლიის განვითარების კონსორციუმთან“ შეთანხმებული სამუშაოების დაწყებისა და ფინანსური დახურვის მიღწევის ჯერ კიდევ 2017 წლის ზაფხული იყო. ჩვენ კვლავ ვიხილავთ მათთან დაფინანსების მოზიდვის საკითხებს. ამ პროცესში სახელმწიფომ უკვე აპატია ინვესტორს 11 მლნ დოლარზე მეტი პირგასამტეხლო, ამ ვადების დარღვევის გამო, მაგრამ ეს არ არის მნიშვნელოვანი. მნიშვნელოვანი არის, რომ ეს პროექტი შედგეს, რადგან ანაკლია არ არის მხოლოდ კომერციული პროექტი, ეს არის ძალიან მნიშვნელოვანი ჩვენი ქვეყნის უსაფრთხოებისთვის, ჩვენი სტრატეგიული მდებარეობის გამოყენებისთვის. დღეს ვკარგავთ გარკვეული კატეგორიის ტვირთებს, რომელიც სხვა შემთხვევაში გაივლიდა ჩვენს ლოგისტიკურ სისტემას ჩვენს საპორტო ინფრასტრუქტურაში, ჩვენ გავაკეთებთ ყველაფერს იმისთვის, რომ ანაკლიის პორტი დროულად ამოქმედდეს.“- განაცხადა ნათია თურნავამ.