„ნაციონალური მოძრაობა" „ლიბერთი ბანკის" პენსიონერებისთვის სესხებზე მაღალი საპროცენტო განაკვეთის გაუქმებას ითხოვს

პოლიტიკა - 13:00, 07 Jun, 2019

1170

გაერთიანებული ოპოზიცია ნაციონალურ მოძრაობასთან ერთად ქვეყანაში არსებულ ეკონომიკურ მდგომარეობასთან დაკავშირებით საპროტესტო აქციას იწყებს.

გრიგოლ ვაშაძემ საზოგადოების წევრებთან შეხვედრისას ქვეყანაში არსებულ მძიმე სოციალურ პირობებზე ისაუბრა და ხაზი გაუსვა პენსიონერების მძიმე მდგომარეობას, მისი თქმით პენსიონერები სახელმწიფოს მხრიდან კაბალურ პირობებში იმყოფებიან. გრიგოლ ვაშაძემ ხელისუფლებას კატეგორიულილ მოთხოვნები წაუყენა, რომლის არშესრულების შემთხვევაში ქვეყანაში ფართომასშტაბიანნი საპროტესტო აქციები დაიწყება

„საქართველოში დღეს კატასტროფული ეკონომიკური სიტუაციაა და ეს სიტუაცია აისახება ყველაზე მეტად დაუცველ კატეგორიებზე პენსიონერებზე და ბავშვებზე. როდესაც ე.წ. ხელისუფლების წარმომადგენლებს ვუსმენ, ისეთი შთაბეჭდილება მექმნება გეგონება პენსიონერები ან პენსიის გაცემა ხელისუფლების ან საზოგადეობის კეთილი ნება არის. მათ ავიწყდებათ, რომ ეს ჩვენი ვალდებულებაა იმ ხალხის მიმართ, ვინც ამ ქვეყანას ქმნიდა, ეკონომიკას ქმნიდა და ამ საზოგადოებას ქმნიდა. და თუ ჩვენ ამ ვალდებულებას პირნათლად არ შევასრულებთ, ჩვენ სახელმწიფო არ გვექნება ნორმალური. 400 ათას პენსიონერს აქვს აღებული პენსიით უზრუნველყოფილი სესხი. ეს იმას ნიშნავს, რომ ეს ისედაც მწირი პენსია პენსიონერს არც სურსათზე ჰყოფნის, არც მედიკამენტებზე ჰყოფნის და არც ის დაგვავიწყდეს რომ საქართველოში, ძალიან ბევრ პატარა ქალაქებსა და სოფლებში პენსიონერების პენსიაზე ხანდახან მთელი ოჯახია ჩამოკიდებული,“-განაცხადა გრიგოლ ვაშაძემ.

გაერთიანებული ოპოზიციის ლიდერი აცხადებს, რომ "ლიბერთი ბანკი", რომელიც გასცემს პენსიას და ამ პენსიით უზრუნველყოფილ სესხს, საპროცენტო განაკვეთი სხვა ბანკებთან შედარებით სამჯერ მეტი აქვს და ის 36%-ს შეადგენს. გრიგოლ ვაშაძის თქმით, "ლიბერთი ბანკი" ძარცვავს პენსიონერებს.

„ ერთიანი ნაციონალური მოძრაობა და გაერთიანებული ოპოზიცია ამ ე.წ ხელისუფლებისგან აბსოლუტურად კატეგორიულად მოითხოვს გაუქმდეს საპროცენტო განაკვეთი წინასწარ აღებულ პენსიებზე და პენსიონერებზე გაცემულ სესხებზე და გახდეს 0% და ეს სესხის გაცემისთვის დადგენილი მომსახურეობის ხარჯი დაფაროს სახელმწიფომ, საკმარისი არის რამდენიც ამ 7 წლის განმავლობაში ამ კომერციულმა ვითომ სტრუქტურებმა ძარცვეს პენსიონერები. ეს შეეხოს არამარტო სამომავლო არამედ ყველა სესხს, რომელიც აღებულია“-განაცხადა გრიგოლ ვაშაძემ.

მისივე თქმით, ყველა პენსიონერს, რომელსაც ამ დრომდე პროცენტების სახით დიდი ოდენობის თანხა ჩამოეჭრა, უკან უნდა დაუბრუნდეს და აღნიშნული ფული იყოს გამოყოფილი ბიუჯეტიდან.