პოლიციელს, რომელიც 16 წლის ბიჭის ცემისა და გაუპატიურების მცდელობის საქმეში ფიგურირებს, ძალადობაში კიდევ ერთი ქალი ადანაშაულებს. ქალის თქმით, 20 წლის წინ ვანო ქევხიშვილთან ახლო ურთიერთობა ჰქონდა, ზეწოლა და მუქარა კი მას შემდეგ დაიწყო, როდესაც დაფეხმძიმდა.

ქალი ამტკიცებს, რომ პოლიციელი მას აბორტის გაკეთებას აიძულებდა და იარაღითაც ემუქრებოდა. ამის მიუხედავად მან ბავშვი მაინც გააჩინა. მაშინ ეს პოლიციელი ვაკის განყოფილებაში მუშაობდა.

„დავფეხმძიმდი და მოითხოვდა ჩემგან აბორტის გაკეთებას. მითხრა, რომ ორი იარაღით დავდივარო და მაჩვენა ეს ორი იარაღი და გაგაქრობ თუ მაგას არ გააკეთებო. გაოგნებული დავრჩი ამ მოძალადე პოლიციელების შესახებ, სადაც მისმა გვარმაც გაიჟღერა. ვანო ქევხიშვილი, როგორც ბავშვმა და მისმა ადვოკატმა გააჟღერეს. ადებს ხელს მას და ამბობს, რომ მან მოიტანა ბოთლი და მემუქრებოდა გაუპატიურებითო. ვითხოვ, რომ კანონის ფარგლებში დასაჯონ,“-აცხადებს ძალადობის მსხვერპლი ქალი.

16 წლის ბიჭის ადვოკატის თქმით, პოლიციელი, რომელსაც ეს ქალი ადანაშაულებს, ორჯერ იყო ამოცნობაზე დაბარებული, თუმცა არ მივიდა და დღემდე თანამდებობაზე რჩება.

„ეს ის ვანო ქევხიშვილია, რომელმაც ბოლნისის რაიონში ჩემი დაცვის ქვეშ მყოფ არასრულწლოვანზე იძალადა. ის კვლავ იკავებს თავის პოზიციას ბოლნისის პოლიციაში. ის დღემდე დადის დაუსჯელი. ჩვენ მოვითხოვთ, რომ უსწრაფესად მოხდეს მისი დაკავება,“-აცხადებს ადვოკატი ფრიდონ სიხუაშვილი.

შეგახსენებთ, ამ საქმის ფიგურანტ სხვა პოლიციელს თორნიკე ონიანს ძალადობაში ადანაშაულებდა კიდევ ერთი ქალი. ქალი აცხადებს, რომ თორნიკე ონიანი მას აბორტის გაკეთებას აიძულებდა. როგორც ის "კურიერთან" ჰყვება, ონიანი თანამზრახველ რევაზ ხარაზის დახმარებით მოქმედებდა. სცემდა და იყო მუქარაც:

„მცემდა ეს ხარაზი, ძალადობდა, მე ახლა თორნიკეს ველაპარაკეო, თორნიკე მოდისო და შენო ვერსად ვერ წახვალო. გააგზავნა თორნიკე ონიანმა ექიმთან, უკვე სამუშაო საათები დამთავრებული იყო და გამოიძახეს ექიმი, შემაბრუნეს აბორტის გასაკეთებლად, მცემა, იძალადა და თვითონ ქეიფობდა რაიონის ელიტასთან ერთად, ამ ყველაფრის შემდეგ. ოჯახიანად ჰაერში აგწევთ, აღარ იარსებებთ და ასეთი მუქარები ხორციელდებოდა ჩემს მიმართ. დავლიე აბები და მოვიწამლე თავი. ეს ის თორნიკე ონიანია, რომელიც არასრულწლოვანი ბავშვის გაუპატიურებაშია ბრალდებული. როგორც ვიცი მას შეწყვეტილი აქვს უფლებამოსილება, მაგრამ ამ დრომდე პასუხისგებაში მიცემული არ არის.“- აცხადებს ის.

წყარო rustavi2.ge