„დღევანდელი ცივილიზაცია მიწიერ კეთილდღეობაზეა აწყობილი... ჩვენი ჭეშმარიტი სამშობლო არის ზეციური სასუფეველი“- მეუფე შიო

პოლიტიკა - 15:54, 06 Jun, 2019

939

სამების საკათედრო ტაძარში ამაღლების დღესასწაულთან დაკავშირებით საზეიმო ლიტურგია საპატრიარქო ტახტის მოსაყდრემ ჩაატარა, რომლის დასრულების შემდეგაც სენაკისა და ჩხოროწყუს მიტროპოლიტმა, მეუფე შიომ მრევლს დღესასწაული მიულოცა და ამაღლების მნიშვნელობაზე ისაუბრა. მეუფე შიოს თქმით, ზეცად ამაღლებით, აღსრულდა ის დანიშნულება, რისთვისაც ადამიანი შეიქმნა:

„ადამიანის ბუნება განიღმრთო. აი, ამ დღეს ვდღესასწაულობთ, განსაკუთრებით მნიშვნელოვანია და მკაფიოდ ჟღერს ეს დღევანდელ ცხოვრებაში. უმეტესწილად დღევანდელი ცივილიზაცია და იდეოლოგია მაინც მიწიერი ცხოვრებისკენ მიგვიზიდავს, მიწიერ კეთილდღეობაზეა აწყობილი ყველაფერი და მთავარი მიზნები ამის გარშემო არის. ამიტომ დღეს განსაკუთრებით მკაფიოდ ჟღერს უფლის ეს სიტყვები და მოწოდება. აქ ჩანს, რომ ჩვენი მოწოდება არის ზეციური ცხოვრება და რომ ჩვენი ჭეშმარიტი სამშობლო არის ზეციური სასუფეველი, რომელიც იწყება მიწიერ ცხოვრებაში. ჩვენ ბედნიერი ვართ, რომ ეკლესიაში გვეძლევა საშუალება, ქრისტესთან თანაზიარებით გავხდეთ ამ ცხოვრების მონაწილე. ღმერთმა დაგლოცოთ, მრავალს დაგასწროთ და უფალმა ინებოს ჩვენი ამაღლება, ჩვენი ოჯახების, ჩვენი ერის, ჩვენი ეკლესიის.“ – აღნიშნა მეუფე შიომ.