"ხდება გახარიას გავლენების გაძლიერება, თუმცა ვინც არ უნდა დაინიშნოს იქნება ოლიგარქ ივანიშვილის მორჩილი"- აკო მინაშვილი მეზვრიშვილის მთავარ პროკურორად შესაძლო დანიშვნაზე

პოლიტიკა - 12:37, 06 Jun, 2019

1073

გაერთიანებული ოპოზიცია - "ძალა ერთობაშიას" წევრი, "ნაციონალური მოძრაობის" ერთ-ერთი ლიდერი, აკო მინაშვილი "ნიუპოსტთან" ამბობს, რომ შინაგან სამეთა მინისტრის მოადგილის, ნათია მეზვრიშვილის მთავარ პროკურორად დანიშვნა, მთავარ საგამოძიებო უწყებაში გიორგი გახარიას გავლენებს გააძლიერებს.
ოპოზიციონერის შეფასებით, ნებისმიერი ადამიანი, ვინც არ უნდა დაინიშნოს, თადუმაძის ადგილზე, ბიძინა ივანიშვილის მორჩილი იქნება.
აკო მინაშვილის განცხადებით, ივანიშვილი მოახლოებული არჩევნების გამო კიდევ უფრო გააქტიურდა და მთავარი სახელმწიფო ინსტიტუტების მონოპოლიზებას შეუდგა:
"ეს არის გახარიას გავლენების გაძლიერება, თუმცა საბოლოო ჯამში, ხომ მნიშვნელობა არ აქვს ვინ იქნება საქართველოში გენერალური პროკურორი. ნებისმიერი ადამიანი, ვინც არ უნდა დაინიშნოს ერთი კონკრეტული ოლიგარქის, ბიძინა ივანიშვილის მორჩილი იქნება. მთელი ამათი პრინციპი ის კი არ არის, იყოს დამოუკიდებელი გამოძიება, დამოუკიდებელი მართლმსაჯულება, დაცული იყოს ადამიანის უფლებები არა, - ბიძინა ივანიშვილის პრინციპია, მთელი ინსტიტუტები მოიქციოს საკუთარ ხელში, რომ მთელი ქვეყანა მოახმაროს საკუთარ ინტერესებს. წინ არჩევნებია და ამ ინსტიტუტების კიდევ უფრო მონოპოლიზება ხდება. ამიტომ ამ შემთხვევაში, მეზვრიშვილი იქნება თუ სხვა, ყველა ეს ადამიანი დაემორჩილება ერთ ვერტიკალს, მთელი ეს ინსტიტუტი მოემსახურება, იმას, რომ საფრთხე არ შეექმნას ივანიშვილის ხელისუფლებას.
საბოლოო ჯამში პირიქით მოხდება, რადგან ადამიანები, არამარტო პოლიტიკური პარტიები, საზოგადოება ძალიან კარგად ხედავს "ოცნების" ხელისუფლების მმართველობის შედეგს: სიღარიბე, გაჭირვება, ადამიანის უფლებების დარღვევა, ხედავთ საერთაშორისო ორგანიზაციების ანგარიშებს. გუშინ, Freedom house-ის განცხადება ვნახეთ, სადაც აღნიშნული იყო, რომ საქართველომ რეიტინგებში უკან დაიხია. საერთაშორისო ორგანიზაცია პირდაპირ მიუთითებდა იმას, რომ ჩვენს ქვეყანაში ორი მთავარი პრობლემაა: არაფორმალური მმართველობა და არარსებული მართლმსაჯულება, კანონის უზენაესობის დარღვევა. მეზვრიშვილიც ამ პოლიტიკის გამგრძელებელი იქნება, ამ სისტემაში, არანაირი თვისობრივი განსხვავება ამ ადამიანებს არ აქვთ, რომლის სათავეში დგას ივანიშვილი"- უთხრა "ნიუპოსტს" აკო მინაშვილმა.