"პროპორციულ სისტემაზე უარის თქმა ნიშნავს, არჩევნების ფორმალურად ჩატარებას და ძალაუფლების მიტაცებას"- ბაჩუკი ქარდავა

პოლიტიკა - 12:38, 06 Jun, 2019

756

ქორთიარდ მერიოტში, 20 ოპოზიციური პარტიის ლიდერთა შეხვედრა მიმდინარეობს, რომლზეც საარჩევნო სისტემის ცვლილებისთვის საჭირო 200 ათასი ხელმოწერის პრეზენტაცია მოხდება. ეროვნულ დემოკრატიული პარტიის ლიდერის ბაჩუკი ქარდავას თქმით, ოპოზიციის და საზოგადოების ამოცანა არის ის, რომ ხელისუფლების უზურპაცია არ მოხდეს, არჩევნები სამართლიანი სისტემით ჩატარდეს, სწორედ ამას ემსახურება ხელმოწერების შეგროვებაც. ქარდავას თქმით, პროპორციული სისტემაზე გადასვლის 2024 წლამდე გადაწევით ივანიშვილი ხელისუფლების შენარჩუნებას ცდილობს, რადგან იცის რომ თუ 2020 წლის არჩევენები პროპორციულად ჩატარდება, ივანიშვილის პარტია უმრავლესობას ვერ მოიპოვებს:

„საქართველოს მთელი ოპოზიციური სპექტრი და საზოგადოება შეთანხმდა, რომ უმჯობესია პროპორციული სისტემა. საინტერესო ისაა, რომ ამაზე „ქართული ოცნებაც“ თანხმობას აცხადებდა და მათ კონსტიტუციაში ჩაწერეს 2024 წელი. გაუგებარია თუ კარგია 2024 წელს მაშინ რატომ არა 2020-ში. გეტყვით რატომაც არა, 2020-ში ბიძინა ივანიშვილს სურს ამ მინი ფეოდალების რესურსის გამოყენებით შეინარჩუნოს ხელისუფლება, რადგან მას არ სჯერა რომ მიიღებს უმრავლესობას. ჩვენი ამოცანა არის ის, რომ ხელისუფლების უზურპაცია არ უნდა მოხდეს, სამართლიანი სისტემით ჩატარდეს არჩევნები და გაიმარჯვოს უფრო ძლიერმა, იმ პოლიტიკურმა ძალებმა, რომელსაც საზოგადოება უჭერს მხარს. რეზიუმე რომ გავაკეთოთ პროპორციულ სისტემაზე უარის თქმა ნიშნავს, არჩევნების ფორმალურად ჩატარებას და ძალაუფლების მიტაცებას.“- განაცხადა ბაჩუკი ქარდავამ.