ვანო მერაბიშვილის ადვოკატის, გიორგი ჩივიაშვილის თქმით, იუსტიციის სამინისტროს მიერ გავრცელებული განცხადება, სადაც აღნიშნულია, რომ ევროპის საბჭოს მინისტრთა კომიტეტი მერაბიშვილის საქმეზე სტრასბურგის სასამართლოს გადაწყვეტილების აღსრულების პროცესს დადებითად აფასებს, სიმართლეს არ შეესაბამება.

იურისტის განცხადებით, სინამდვილეში მინისტრთა კომიტეტი შეშფოთებულია იმ ფაქტით, რომ ამ ეტაპზე გამოძიება დასრულებული არ არის.

"პრაქტიკულად, მინისტრთა კომიტეტმა გამოთქვა შეშფოთება, რომ არ არის გამოძიება ამ ეტაპზე დასრულებული. იუსტიციის სამინისტროს მიერ გაკეთებული დღევანდელი განცხადება ცოტა არ იყოს, უცნაურია. ვერც კი წარმოგვიდგენია, როგორ შეიძლება ასე სხვანაირი მსჯელობით, მიაწოდო ინფორმაცია საზოგადოებას, როდესაც აბსოლუტურად სხვა რამეზეა საუბარი. მათ განაცხადეს, რომ, თითქოსდა, სექტემბერში აღარ ჩატარდება შემდგომი სხდომა მერაბიშვილი საკითხის განხილვასთან დაკავშირებით. მინისტრთა კომიტეტმა ვადა განუსაზღვრა, რომ 2019 წლის 30 სექტემბრამდე ყველა ეს რეკომენდაცია, რომელიც ახლა გაიცა, ინფორმაციის სახით უნდა წარუდგინოს საქართველოს ხელისუფლებამ მინისტრთა კომიტეტს,“ - განაცხადა გიორგი ჩივიაშვილმა.