"Freedom house-მა პირდაპირ დაადასტურა, რომ საქართველო ერთი ადამიანის პოლიტიკურ საკუთრებაშია "- რომან გოცირიძე

პოლიტიკა - 17:20, 05 Jun, 2019

1074

"საქართველო ერთი ადამიანის პოლიტიკურ საკუთრებაშია"- ასე აფასებს ფრაქცია "ნაციონალური მოძრაობის" თავმჯდომარე, რომან გოცირიძე Freedom house-ის მწვავე ანგარიშს, სადაც გავლენიანი საერთაშორისო ორგანიზაცია პირდაპირ მიუთითებს, რომ საქართველო უკან იხევს. რომან გოცირიძე "ნიუპოსტთან" საუბრისას აცხადებს, რომ ყველა პრობლემის სათავე, არაფორმალური მმართველი ბიძინა ივანიშვილია.

"Freedom house-ის ანგარიშის ტექსტი, ნებისმიერი ადამიანისთვის ისე რომ გეჩვენებინათ, რომ ავტორის დასახელებისთვის ხელი დაგეფარებინათ, ყგველა იტყოდა, რომ ეს არის რომელიღაც ოპოზიციური პარტიის შეხედულება. მმართველი უმრავლესობა კი დაიწყებდა ქილიკს - ხედავთ, ოპოზიცია რას ამბობს?! სინამდვილეში, Freedom house-ის ანგარიში ემთხვევა, ზუსტად იმას, რასაც ამბობს ოპოზიცია, საქართველოს არასამთავრობო სექტორი, მედია, მთელი ქვეყანა და რასაც ამბობს მთელი საერთაშორისო საზოგადოება.

საერთაშორისო ორგანიზაციის ამ ანგარიშის მთავარი შინაარსი არის ასეთი - საქართველოში ქვეყანა არ იმართება კონსტიტუციისა და კანონების შესაბამისად. საქართველოს მართავს ერთი ოლიგარქი. ქვეყანაში არის ოლიგარქიული მმართველობა და ეს ერთი ადამიანი წყვეტს ყველაფრის ბედს. ის არის პარლამენტის უფროსი, მოსამართლეების, მთავრობის, პროკურატურის და ძალიან ბევრი მედია საშუალების უფროსი. აი ეს თქვა Freedom house-მა პირდაპირ, ყოველგვარი დიპლომატიური მიკიბ-მოკიბვის გარეშე"- განუცხადა დეპუტატმა "ნიუპოსტს".

რომან გოცირიძე განსაკუთრებულად გამოყოფს სიტყვის თავისუფლების კუთხით არსებულ რეგრესზე, რაზეც საერთაშორისო ორგანიზაცია თავის უმწვავეს ანგარიშში ხაზგასმით აღნიშნავს.

"ბიძინა ივანიშვილის ხელისუფლებამ ამ მიმართულებითაც გადადგა უკან ნაბიჯი. შუა აზიის ქვეყნებს გვადარებენ, მათთან შედარებით წარმატებულად მოგვიხსენიებენ. ეს არის ქვეყნები, სადაც 30 წელიწადია ხელისუფლება არ შეცვლილა, როცა ჩვენ ვეტოლებოდით ევროკავშირისა და დასავლურ დემოკრატიულ ქვეყნებს. დღეს პოსტსაბჭოთა ან ბალტიისპირეთის ქვეყნებს, უკრაინას ან მოლდოვას კი არ გვადარებენ, არამედ გვადარებენ შუა აზიის ქვეყნებს, სადაც არის ავტორიტარული რეჟიმები და ხელისუფლება კლანურად ან შთამომავლობით გადაეცემა. რეალურად იგივე თქვა ავსტრიის ელჩმა რამდენიმე დღის წინ, ოღონდ დიპლომატიური ენით, როგორც ეს დიპლომატებს შეეფერებათ.

ბოლოს, ამ ყველეფრის გათვალისწინებით, საერთაშორისო საზოგადოებაში ჩამოყალიბებულია აზრი, რომ რეალურად საქართველო არის ერთი ადამიანის პოლიტიკურ საკუთრებაშია"- განაცხადა რომან გოცირიძემ.